الممثلة منال عبد القوي: انتظرنا قرارات للمرأة الفقيرة ففوجئنا بالانتصار للبورجوازية

في تعليقها على مقترح رئيس الجمهورية بخصوص المساواة في الميراث بين الرجل و المرأة قالت الممثلة منال عبد القوي أن هذا المقترح يخص المرأة البورجوازية في علاقتها بأخيها أو في مسألة زواجها بغير المسلم و لا يخص المرأة الفقيرة و الكادحة ،

و اضافت في تدوينة لها على صفحتها بالفيس بوك: عفوا سيدي الرئيس عندي كليمتين بنقولهملك: القرارات الي أعلنت عليها  تخصّ المرأة البورجوازيّة الي مشكلتها الإرث هي وخوها ولا انها تاخذ راجل مش مسلم…. وينهم القرارات لصالح المرا الزوّالية لي تجني في الطماطم والفلفل والعنب ب 5 و 7 الاف في النهار؟؟؟ وتتقلب بيها الكميونة الخردة لي هازتها مالفجورات بش تروّح في المغارب؟؟؟ وينهم القرارات للمنظّفة والمعينة المنزلية لي ياكلولها عرقها وجهدها وعمرها ويعتديوا عليها جسديا وجنسيا؟؟؟ وينهم القرارات للمرا لي عندها ولاد معاقين ولا مرضى وماعندهاش كرني بش تعالجهم؟؟؟ وينهم القرارات للمرا لي تخلص عالحضيرة وبنت المعمل لي ظهرها يتقسم وعينيها تتنقب ويديها تحلّف بش تخلص 300 دينار؟؟؟ وينهم القرارات للمرا العزوزة لي تاخو في شهرية شيخوخة 100 دينار؟؟؟ وينهم القرارات للمرا لي ما عرّستش لين كبرت ولا عرست ولوحوها ولادها ولا ما عندهاش ولاد ومنجمتش تلتحق بمركز مسنّين؟؟؟”

و اضافت “نطّقتني سيدي الرئيس وانت تاخذ في قراراتك في برجك العاجي اهبط للارياف وين الثلج يغطّي الاكواخ في الشتا والشمس تقتل الكبار في الصيف ، وين الراجل يبدا قاعد يلعب في الكارطة في القهوة ومرتو تخدم وكي يجي كميون الغاز يبعث ولدو يقوللو برا قول لامك تجي تهز دبوزة القاز…. برّا اعمل دورة في شوارع تونس في الليل تو تشوف قداش من مرا تاكل مالزبلة وراقدة على كردونة زيد ثبّت تو تشوف قداش من بنيّة قاصر تخدم ولا تدور برضيع جاباتو بعد ما شدّها ولد حرام عدّاها عليها وهرب… عفوا سيدي الرئيس البرجواز ي…….. زيد بربش في مشاكل المرا التونسية تو تلقا ما يندّب الوجه فبحيث يا ناري عتونس وبرّه.”