تحولت المدرسة الاعدادية ببرج الوزير بسكرة الى مدرسة نموذجية بعد ان كانت تفتقر لابسط مقومات التعليم .
و في هذا السياق نشرت الاستاذة فاطمة الرياحي تدوينة على صفحتها الرسمية الفايسبوك ابرزت فيها مساهمتها في ترميم و صيانة هذه المدرسة .
و جاءت تدوينتها كالتالي : “بعد نهاية الحاقي بالهيئة الوطنية لمكافحة الفساد، رجعت للتعليم، هو من المفروض وتطبيقا لقانون الوظيفه العمومية نرجع لبلاصتي المدرسة الاعدادية برج البكوش ولكن خذاوها الصحاح، فحطوني في اعدادية برج الوزير، خارجه تاعبه من الهيئة و ماعينتيش نعمل العرك مشيت نخدم ونكتشف.
اعدادية برج الوزير في بيئة صعيبه برشا، حي النسيم وبكل ما يعنيه من أفلام أكشن ليلية ونهارية ومطاردات بوليسية ومغامرات ما فيهش حتى وسيله من وسائل الترفيه اللي ممكن تخرج التلامذه من الظلمات الى النور، اللي داير بالمدرسة قاعة العاب بلاي ستايشن بدائية و عشرين قهوة وسبعين محل فاست فود، العنف اللي يتمارس على التلامذه في الدار وفي الشارع يعاودو ينتجوه التلامذه في المدرسة، مش على خاطرهم خايبين لا بالعكس بل لانو حتى حد ما عطاهم بديل ولا سمعهم ولا عطاهم فرصه بش يعبرو على أرواحهم من غير خوف…
دخلت للمدرسة نلقاها بكلها اشغال صيانه وترميم وكالعاده مافماش قاعه للمسرح… ومانعرفش وقتاش يفهمو القائمين على وزارة التربية انو راهو المسرح ما يتقراش في قاعة درس بالطواول والكراسي، وهذا موضوع اخر يطول شرحو…
بديت نخدم مع تلامذتي في مشاريع صغيرة متع صناعة عرائس القفاز و صناعة مسارح الدمى وبدينا نحكيو في الورشات وبداو التلامذه يصنعو ويتعلمو ويكتشفو…
حكيت مع مديرة المؤسسه في امكانية استصلاح قاعة وتخصيصها للنشاط الثقافي ووافقت ، كلمت سيف الدين الجلاصي رئيس جمعيىة فني رغما عني لا محالة انا مرجتلو الكبده متاعو وان شاء الله يسامحني وجاء هو والاولاد وبدات الرحلة متع التغيير.
1200 تلميذ في المدرسة نقري في تقريب نصفهم (اي اي وهذيكا معظله اخرى) مع كل دهنه لحيوط القاعه كانو حاضرين مع كل تصويرة جديدة تترسم كانو شايخين ونهار اللي بالحق لقاو الالوان ماعادش رمادية وزرقاء وقاعتهم مليانه الوان جميله ومنعشه عينيهم ولات تلمع بالفرحة والطاقه عندهم تجددت .
أنا نشكر برشا جمعية فني رغما عني على زراعة الأمل، ونشكر برشا تلامذتي اللي كل لحظة كانو يثبتو انهم يستحقو ما خير، تلامذتي اللى وقفو معاي ينظفو ويسيقو ويزينو ويضحكو ويتكلمو ويعبرو على ارواحهم من غير خوف وبكل أمل. تلامذتي اللي كل يوم يحاولو يزرعو احساس الانتماء للمؤسسة التربوية متاعهم بالرغم من كل شيء و قاعدين يحافظو عليها، تلامذتي اللي يخزرو كل يوم للشطر المعبي ويعاونو في بش نركز على الأمل …
المدرسة الاعدادية برج الوزير مازالت تستحق مكتبة 1200 تلميذ ماعندهمش مكتبة ومازالت تستحق قاعة مراجعه كبيرة بش التلامذه ماعادش تقعد في الشارع فين تتعرض برشا بنات للتحرش من البيدوفيليين اللي نهار وكلو مزروعين قدام الباب والاولاد للبراكاجات والتعنيف. والمشاريع هذي تنجم تتحقق وما تقعدش حلمه لو كان نحطو بكلنا اليد في اليد واللي يحب يعاوننا انو نعملو المكتبة وقاعة المراجعه مرحبا بيه.”
شارك رأيك