برهان بسيس يعلق على حفل زفاف نجل المباركي الأسطوري :”هل كان عليه ان يتحيل ويلعب دور النضال باش ترضى عليه عباد ربي؟”

استنكر برهان بسيس الهجمة الشرسة التي تعرض لها الامين العام المساعد باتحاد الشغل بو علي المباركي خلال حفل زفاف ابنه .

وقال بسيس في تدوينة فايسبوكية : “يعني في نظر هالعباد سي بو علي المباركي باعتبارو قيادي في اتحاد العمال كان مالمفترض يعمل عرس ولدو في ساحة محمد علي وسط الشغيلة والا في اعتصام من اعتصامات الخدامة بش ترضى عليه عباد ربي….. يعني يلزمو يتحيل ويلعب دور النضال حتى في عرس ولدو”…..

كما نشر بسيس تدوينة ثانية حول ذات الموضوع قال فيها : “الي يحبو يفهمو الشأن العام يلزم قبل يفهمو بلادنا في عمقها الحقيقي قبل الشعارات الفارغة ومبعد يصدرو الأحكام وينصبو المحاكم الاخلاقية والسياسية لعباد ربي”…..

وفي يالي نص التدوينتين:

بربي بوعلي المباركي عمل عرس ولدو والعباد طايحة تحسبلو في عدد العلالش الي ذبحهم وشكون حضرلو من ضياف وشكون جاه من فنانين….
يعني في نظر هالعباد سي بو علي المباركي باعتبارو قيادي في اتحاد العمال كان مالمفترض يعمل عرس ولدو في ساحة محمد علي وسط الشغيلة والا في اعتصام من اعتصامات الخدامة بش ترضى عليه عباد ربي….. يعني يلزمو يتحيل ويلعب دور النضال حتى في عرس ولدو…..
باع ارض… امو باعت ذهبها… بوعلي المباركي ورث على بوه….. شنوة هالعقلية السخيفة متع الحقد والحسد والكراهية….. يعمل عرس ولدو ويفرح، هاذي امورو الشخصية اش دخلكم فيه بحق الآلهة؟؟
يا سي بوعلي المباركي مبروك عليك عرس الوليد وان شاء الله تفرح باولاد اولادو.

بربي رأي رقم 2 حول عرس ولد سي بوعلي المباركي الي البعض يحب يحولو لقضية رأي عام.

بوعلي المباركي شخص يحضر الافراح و المآتم و لا يتخلف عن أي مناسبة في جهته وهو يحظى باحترام كبير من عرشه اولاد عزيز وهو من أكبر العروش بالولاية منتشر على ثلاث معتمديات، عرش متضامن جدا ولديه عادة اجتماعية ان هدية الزواج علوش و عند رد الهدية يكون بمقدار ما قدمت.
بوعلي المباركي من عائلة فلاحية على سفح جبل ريحانة من اكبر مربي الأغنام و كان هو وعائلته دائم الحضور في أفراح المنطقة والعرش بالتزام كامل بهذه العادات

أركان عرس عرش اولاد عزيز ثلاثة 
– الفروسية للرجال و الضيوف في البداية لان اغلبهم يهني و يغادر
– العشاء للجميع و يجب ان تقدم فيه اكلة المسلان للضيوف وهو معروف عند الجهات المتاخمة لسلسلة الجبال التي تربط اولاد عزيز…….

الي يحبو يفهمو الشأن العام يلزم قبل يفهمو بلادنا في عمقها الحقيقي قبل الشعارات الفارغة ومبعد يصدرو الأحكام وينصبو المحاكم الاخلاقية والسياسية لعباد ربي…..