نشر ياسين العياري، النائب عن أمل و عمل، مساء اليوم الخميس 20 فيفري 2020 على صفحته الرسمية بالفايسبوك، رسالة يرد فيها على عبد الطيف العلوي النائب عن ائتلاف الكرامة الذي علق على استقالة النائبة ايمان بالطيب، و يقول له ليتركه و شانه، هو الذي لا يشبع من البغض و يتساءل العياري إن كان يزوره ليلا و هو في احلامه في ايحاء جنسي. و يقول له بأن لايخجل من ذلك بما ان هناك من استقال من حزبه و قال عنه أنه مثلي جنسي.
“إلى عبد اللطيف العلوي،
ألا تشبع من البخص أبدا؟ هل يمكن أن تقضي يوما دون أن تذكرني؟ هل أزورك في أحلامك؟ لا تخجل و قل!
نعتني بالجثة بعد خروج النائبة إيمان بالطيب،
حين خرج منكم 4، قال أحدهم فيك أنك “مثلي جنسي” و أنه عرفك عبد الحميد الجلاصي و أنكم ماخذين فلوس، عندكم فساد مالي.
حين خرجت إيمان بالطيب، تمنينالها التوفيق و قلنالها على ذمتك إذا إستحقيت أي حاجة 🙂
يبدوا أن عالم الجثث أرقى من العالم الذي تعيش فيه!
دعني أحدثك عن الجثة،
في قانون المالية، الجثة وحدها نجحت إنها تعدي فصل، ينفع الناس كل الناس.
في حين فشلتم على كثرتكم، في تمرير أي فصل و قد حاولتم فقط تعديو قانون ينحي خطية لواحد منكم بوقاحة متع مافيات ، رفضتم المعاملة بالمثل على السياح الي عاملين علينا فيزا رغم أنكم حكيتوا مطولا في الموضوع في التلافز.. خاطر معاكم شكون عنده وكالة أسفار و مصلحته قبل مصلحة البلد.
الجثة في 100 يوم عملت 5 مبادرات تشريعية فيها حلول حقيقية، تنفع الناس
فكم قدمتم من مبادرة؟ نزيد معاكم عروفاتكم و ما تخلطوش.
هل تسمح أن تعلمك الجثة الحساب؟
إجمع كل الأسئلة الكتابية لكتلتك و زيد معاهم كل الأسئلة الكتابية لعروفاتك و أضرب المجموع في 3 كان حافظ جدول الضرب.
ستجد أن الجثة وحدها، عملت أكثر من ذلك!
كل سؤال كتابي هو مشكلة لمواطن أو جهة أو قطاع، أصبحت في طريقها للحل.
كل سؤال.. ينفع الناس!
الجثة قدمت أمس 3 قضايا، 3 ملفات فساد، تخدموا و تعداو للمحكمة.
لن أتعبك و أسئلك عنك و عن عروفاتك.. لن أطلب منك أن تضرب عدد قضايا الفساد الي خدمتوها في 100.. ساهلة عاد هذه 🙂 100 في صفر راهي تساوي 0، أحفظها.
جاء في الأثر : رجل كألف و ألف كأف.
الي إنتخبوا الجثة، لقاو الوضوح، لقاو برنامج إنتخابي يتطبق، بحذافيره.. نحترموهم و نعيطولهم “السادة المواطنين”
زعمة الي إنتخبكم باش تجيبو الثروات و لقاكم عاطين لجنة الطاقة لعبير و بعذر أقبح من ذنب، هانا خذينا لجنة الإدارة لفصل الأمني عن الإداري في حين هذاكا يتم بمبادرة تشريعية ما يبدل رئاسة اللجنة فيها شيء في حين رئاسة لجنة الطاقة يبدل كل شيء، شنية أحواله؟
زعمة الي إنتخبكم باش إتطردوا سفير فرانسا و تنحيو الفيزا و لقاكم صابين فيزوات عنده و كيف جاء للمجلس فصعتوا باش ما يتغشش منكم، شنية أحواله؟
زعمة الي إنتخبكم باش تنحيو ال s17 و مزال فيكم شكون ياخذ عليها “أتعاب” شنية أحواله؟
زعمة الي جد عليه حكاية فلسطين و القدس و التطبيع و لقاكم مصوتين لروني الطرابلسي، الي صوتلكم خاطر معادش تحبوا وزراء فرنسيس و لقاكم مصوتين لمهى العيساوي، الي إختاركم باش تتصداو للمقرونة و تكونوا مع الثورة و لقاكم مصوتين لفاضل عبد الكافي، شنية أحواله؟
نزيدك؟
باهي الي إنتخبكم باش تكونوا صوت الحق و ضد كمال اللطيف.. يسألكم ساعات على شريف الجبالي و وينكم في قضية الوردانين ما سمعناش حسكم.. أو يتفهم أن الخبزة مرة؟
الي إنتخبكم باش تكونوا حزام سياسي لقيس سعيد فلقاكم تخرجوا على الرئيس في الإشاعات الكاذبة.. تنجمو تغزروله في عينيه؟
آخر وحدة و يزيك.. الي إنتخبكم باش تكونوا صوت الثورة و لقاكم صوت النهضة.. شحواله؟
شحوالهم سي عبلطيف؟ أم انهم كما نعتهم ” حمقى و مغفلين”؟
و هذا الكل.. في 99 يوم.
من الجثة سي عبلطيف؟ 🙂 صدقا!
دعك مني، نجاوبك في أوقات فراغي، أما موش على حساب خدمتي، موش على حساب ما ينفع الناس، في حين ما تعمل في شي إذا استثنينا التبندير للنهضة! تقوم و تصبح على ذكري 🙂
أسمع، جرب طريقة زميلك المحترم المتدين الثوري زياد الهاشمي، الي في رمضان الي فات، باش يسبني جبدلي عرضي و قام يقذف في محصنات و في مرا بريئة
و إلا كي زميلك الآخر.. الي كان كل جمعة يخرج عليا إشاعة كاذبة.
خاطر بش نقلك، إيجا نافسني في ما ينفع الناس، هاكم عشرين و معاكم النهضة و عندكم الفلوس و الإمكانيات.. حتى لتو، يبدوا أنه جثة غلبتكم 🙂
سي عبلطيف،
يخرج الحي من الميت و يخرج الميت من الحي و يحي العظام و هي رميم.
الجثة توة ما تنجم كان تطلع، غلطنا و نراجعوا رواحنا و نتحسنوا
في حين ما تنجموا كان تتكبوا.. ستجدون أنفسكم معارضة كرتونية، خدموا بيكم و حطوكم على جنب، كليناكس بائس انتهت مهمته، فقط تعارضون من يعارض النهضة 🙂 حاجة تشبه لبوشيحة تحت بن علي.
سي عبلطيف بوشيحة،
هل لك مرآة؟ أنظر عبرها.. من فعلا الجثة 🙂 ؟
ريتكم عملتوا حويجة تلموا بيها طلبات ال s17.. نفرحوا كي تقلدونا، بالحق.. اما راهو فيها مشكلة، المعطيات الشخصية متع الناس يمكن إنتهاكها بسهولة! ردوا بالكم و على الذمة (بصدق مانيش نتهكم) كان تحبوا نعطيوكم تطبيقة أكثر أمنا، تنجم تسبنا و تفتري علينا قد ما تحب، لما حاجة فيها ما ينفع الناس، نضع كل شيء جانبا.
آسف كان تأخرت في الرد عليك، على عكسك، ما نتلهى بأمثالك، كان بعد ما نكمل خدمتي، كان بعد ما نكمل.. ما ينفع الناس، و سيكون الأمر هكذا .. كل مرة.
في كل الحالات، كان قابلت سي نوردين في أروقة المجلس، توة نعمل معاه constat.. يبدو أني ..جرحتله الباراشوك.
مع مودتي.“
شارك رأيك