بعد العديد من الاجتماعات و اللقاءات، مجموعة من الشباب من جميع الجهات تعلن مساء اليوم الجمعة 24 سبتمبر 2021 عن اطلاق حركة شباب التغيير.
ننشر هنا ما ورد علينا للتعريف بهوية الحركة و باهدافها:
“حركة شباب التغيير
+أحنا شكون ؟؟
أحنا شباب من كل جهات الجمهورية التونسية مؤمنين بأنفسنا و عنا الثقة باش يجي نهار و تونس تتبدل … قعدنا نفكروا برشا في بناء هيكل يكون شبابي بإمتياز يدافع على حق الشباب في كل المجالات سوى السياسي ، الإجتماعي أو الثقافي … الشباب هو ليس فقط وسيلة للهدف و التنفيذ بل هو الهدف بحد ذاته و فاعل ليس مفعول به …
كل المسارات التاريخية لتونس صنعها الشباب أهمهم ثورة 2011 ألا ركبوا عليها و اندثر حلمنا من شغل و كرامة وطنية … هاكا علاش أحنا ليوم معادش ساكتين و مستقبلنا نحبوا نرسموه بيدينا …
+أما كيفاش ؟؟
أسسنا حركة شباب التغيير .. حركة و ليس حزب ، الحركات تتولد في عديد الدول حين تكون هنالك أزمات … ليوم بعد 25 جويلية عنا الأمل في تونس جديدة ، تونس دولة ديمقراطية قوية تراهن على كفاءاتها و تهتم بشبابها …
+و ما العمل؟؟
نهيكلوا الشباب بجميع الفئات و جميع التوجهات الإيديولوجية .. ندافعوا أولا على المسار التصحيحي المنطلق من يوم 25 جويلية و نساهموا فعليا في بناء تونس الجديدة “سننطلق في وضع برنامجنا الاقتصادي و الإجتماعي مع تشريك كافة شباب الحركة ابتداءا من غدوة” … نعمل على تكوين الشباب في كل المجالات و ندافع على حقهم في الشغل و العيش الكريم كما ندفعهم لتولي المراكز الهامة للدولة .. فلا حل لبلادنا دون وقوف شبابها ..
+شكون وراكم؟؟
ما ورانا حتى شخص .. ورانا محبة تونس و الإرادة القوية لشبابنا الواعي ألا يحمل طاقات كبيرة في إصلاح و تغيير تونس العزيزة علينا … اذن فاش ننتظروا باش نصلحوا بلادنا ..
شباب التغيير
إرادة قوة تغيير”.
شارك رأيك