الشاعر لزهر الضاوي يكتب (“نصيحة” بعد فوات الأوان” الى روح النقيب “المشنوق” “محسن العديلي”)

-” النصيحة”..؟؟-

( “نصيحة”..بعد فوات الاوان” .. الى روح النقيب “المشنوق” “محسن العديلي”)

“طفي الضوء” كيما لخرين..
وقول بلادي هي “الجّنّة”..!!
وغطي على الارهابيين..
تسلم فيها وتتهنى..؟!!
..يحطوك بين رموش العين..
ويلمع صدرك ب “نياشين”..!!
وتولّي “نقيب الدين”..
يحَنّوا كفك بالحنة..!!!
..جاي تكشف في السر لواش..؟؟
وعامل في “القُمّة” برباش..؟!
وقالولك ماتكشفهاش..
و”القُمّة” فيها ” إنّ”….؟؟؟
..في بلادي بلاد النفاق..
بلاد ” المافيات” والسراق..
المسروق يتباع في الاسواق..
والسارق فينا ومنا..؟!!
والسراق “كلاب السوق”..
شنقوك وقالوا “مشنوق”..؟!!
وسكتوا “جماعة الحقوق”..
و”القاضي”.. نام وننّى..؟!!
..وفي بلادي بلاد “الخْننْ”..
و”هلموا لِمجد الزمن”..
” لي يذوب في حب الوطن”..
يرحل خير….مايستنى..؟؟!!

“طفي الضوء” كيما لخرين..
وقول بلادي هيّ “الجنة”..؟!!