الأمانة العامة لقوات الأمن الداخلي تقاضي هيثم المكي و هذا الأخير يوضح على موجات اذاعة إفم ( فيديو المداخلة + وثيقة)

• في الفيديو: المداخلة التي على اثرها تقدمت النقابة بشكاية ضد هيثم المكي و الياس الغربي

ننقل هنا حرفيا ما ورد على لسان الصحفي هيثم المكي خلال مداخلة له في برنامج في 90 دقيقة على إي أف أم، اليوم الأربعاء 17 ماي 2023، بخصوص تصريحات الأمين العام للأمانة العامة لقوات الأمن الداخلي عز الدين الجبالي.

وقال المكي:” الكلام اللي يقول فيه السيد غالط أنا ما قلتش الكلام هذا، خلي نحطوا الحكاية في سياقها، الكلام كان تعليق على تصريح لأحد القياديين في حراك 25 جويلية، وهذا اللي كنا نحكيوا عليه، نذكروا أنو كنا نحكيوا على عملية توفاو فيها 3 أمنيين، المنطلق مش التجريح في قطاع الأمن واستهدافو، المنطلق هو أنو شنوة يلزمنا نعملوا بش اللي صار في جربة ما يعاودش يصير وما نلقاوش عنصر متطرف في وسط سلك الأمن يقتل زملاؤو، تركيزنا كان على ضرورة مراجعة شروط الانتداب في سلك الأمن، مستحيل نقول أنو كل أمني فصالة ويبيع المخدرات، ببساطة خاطرني بعقلي، اللي قلتو هو أنو يلزم مراجعة شروط الانتداب واختبارات تقنية نفسية في انتداب أعوان الأمن بش نفهموا علاش الشخص يحب يولي أمني، يلزمنا نعرفوا هل أنو السيد يحب يولي أمني خاطر يحب يحمي المواطنين ويدافع على البلاد ويحقق العدالة ويدافع على القانون وإلا يحب يولي أمني بش تولي عندو سلطة بش ينجم يظلم غيرو… وهنا نجيو لموضوع الشكاية على خاطر فما فصايل يوليوا أمنيين هذا شنوة قلت، فما ناس يكونوا فصايل يبراكيو ويعملوا في المشاكل في الحومة وفهمهم المحدود للعالم اللي داير بيهم يوصللهم أنو مركز القوة والسلطة في الحومة والبلاد هو أمني إذن يحبوا هوما زادة يوليوا أمنيين ومش بالضرورة عندهم سوابق مسجلة”…
………

أكد عز الدين الجبالي الأمين العام للأمانة العامة لقوات الأمن الداخلي اليوم الأربعاء 17 ماي 2023، خلال مداخلة هاتفية مع برنامج في 90 دقيقة على إي أف أم، أنه تقرر مقاضاة الكرونيكور والإعلامي هيثم المكي.
وقال الجبالي:” شفنا الكلام فيه برشا تجريح ومس من كرامة الأمنيين، كلام يقول يدخل الأمن كان الفصايل والمجرمة وبياعة المخدرات ويدخلو بوساطة، حتى طرق المؤسسة الأمنية شكك فيها السيد هذا، الكلام هذا مسنا برشا ومس عايلاتنا، الواحد ما عادش ينجم يهز راسو ويوري وجهو في حتى بلاصة، الأمنيين يعني الكلنا تجار مخدرات، أحنا مجرمة وفصايل وندخلوا للأمن بش نفرضوا نفوذنا على أهالينا وولاد حومتنا وجيرانا، الكلام هذا مش معقول، والله حتى كان غلط هو تعدى على المباشر ومن المفروض إذاعة موزاييك ما تعاودش تهبطها على الصفحة متاعها وتخليها، يعني حاجة عادية جدا ولت أمني كي يتمس في شرفو وفي سمعتو قدام صغارو وقدام أنسابو، كلام يجرح برشا وجعنا برشا مسنا… فما بيناتنا القضاء… السيد تمادى في عديد المرات، مش أول مرة يجرح الأمنيين، خذينا قرار أنو القضاء هو الفيصل، مش بش يقعد هو يحكي ونحنا نجاوبوا”…

• المصدر: اذاعة إفم