نشر الفنان الملتزم ياسر جرادي، المدافع الشرس عن القضايا العادلة تدوينة على حسابه بالفايسبوك بخصوص الدعوة التي أطلقها رواد صفحات التواصل الاجتماعي لمقاطعة الدورة 48 لمهرجان دقة الدولي (من 29 جوان إلى 10 جويلية 2024)، جاء فيها ما يلي:
” فيما يخصّ الدّعوة لمقاطعة مهرجان دُڤّة الدّولي بسبب وجود ثلاثة مستشهرين من دولْ تساهم في الإبادة الجماعيّة في غزّة: المراكز الثّقافيّة لفرنسا بريطانيا وألمانيا.
المهرجان هذا تونسي، تشرف عليه وزارة الشّؤون الثّقافيّة والمؤسّسة الوطنيّة لتنمية المهرجانات وكذلك وكالة إحياء التّراث ومعاهم 29 مستشهر منهم الثّلاثة المذكورين أعلاه وإلّي مساهمتهم تتمثّل أساسا في جلب فنّانين أجانب من إختيار هيئة المهرجان إلّي برمجتْ عرض مهدى إلى فلسطين نأثّثو مع مجموعتي “ديما ديما” في جزء أوّل والفنّانة الفلسطينيّة رلى عازر في جزء ثاني.
إدارة المهرجان أعلمتني بالمعطيات هذي الكل قبل التّعاقد وأني قبلت، لأنّ السّهرة المهدات إلى المقاومة الفلسطينيّة الوقْع متاعها أكبر وأهمّ للقضيّة في الظّرف الحالي .
ملاحظة: المستشهرين الثّلاثة إلّي حكينا عليهم موجودين في أغلب المهرجانات والتّظاهرات التّونسيّة الكبرى”.
** هذا و قد نشرت هيئة الدورة 48 لمهرجان دقة الدولي أول أمس ما يلي على صفحتها الرسمية بالفايسبوك:
“أحباء مهرجان دڨة الدولي،
لفت انتباهنا إلي فمّا شكون ينتحل في إسم المهرجان على تيك توك. نحبو نعلموكم إلي الحسابات الرسمية لمهرجان دڨة الدولي موجودة على أنستغرام (@festivalinternationaldedougga) وفايسبوك (@fidougga) كهو.
و ما عندناش حتى حساب رسمي على تيك توك.
نعتذرو منكم على أي إزعاج تسبب فيه ونأكدو إلي الكلكم مرحب بيكم في دڨة للاحتفال بالثقافة والتراث. شكرًا على تفهمكم.
نشوفوكم على قريب في المهرجان!”.