في بلاغ صادر عنه اليوم الأحد، أكد عادل اللطيفي الاستاذ في الجامعات الفرنسية بأنه قد وضع كتابه تحت ذمة العموم للقراءة المجانية كما أضاف ما يلي:
“بلاغ للعموم: توفير كتابي “وين ماشين؟” للقراءة المجانية للجميع.
قررت ننشر الكتاب على النت باش الناس لكل تتمكن من القراءة مجانا سواء على الهواتف أو على الحاسوب. اتخذت ها القرار لعدة أسباب:
- باش نسهل على برشا توانسة لقاو صعوبة للوصول للنسخة الورقية مثل الشباب أو التوانسة في داخل الجمهورية وفي الخارج.
- الكتاب فيه تشخيص لوضع تونس من 2011 إلى لليوم وفيه أدوات تساعد في فهم الواقع اليوم والعبث اللي صاير، ولكن فيه خاصة بدائل عملية كمشروع بديل وتحديد لوسائل العمل عليه. وهذا يسهل النقاش.
- السياق الحالي متاع سلطة فاشلة وغياب بدائل تجديد من عند الفاعلين التقليديين ورغبة التوانسة باش يفهمو ها العبث في السلطة وفهم هاك المظاهر المجتمعية كيما الشماتة والتشفي ….
- تفنيد هاك الفكرة السايدة اللي تقول مافماش بدائل وما فماش حلول وحد ما كتب وووو. هانو قدامك أقرا واكتب وقول بالحجج والأدلة حتى راهو كتاب تافه أو حتى مسروق.
- الكتاب يضرب هاك التقسيم العقيم بين النخب الأكاديمية والفاعلين السياسيين وعامة التوانسة، لذلك من المهم تتوسع القراءة متاعو. هاك التقسيم هو سبب عقم الفاعلين التقليديين في الشأن العام.
- كيما هو مقترح في القسم الثالث، من بين الأهداف هو خلق ديناميكية اتصالية حول الحريات والحقوق المتساوية للجميع، باش نسترجعو النقاش العمومي والفضاء العمومي كذلك، لذلك نشر الكتاب والنقاش حولو وحول المقترحات العملية هو مساهمة لخلق أرضية لها الديناميكية.
- موقع الأنترنت اللي خصصتو لها الهدف (من إعدادي الشخصي على ووردبرس www.winmachin.com) يمكّن القراء من التفاعل وإبداء الرأي. الموقع هو فضاء مفتوح للي عندهم أفكار وقادرين يكتبو مقالات ويقدمو أفكار. ومعذرة اذا فمة اخلالات تقنية، هاذاكا جهدي.
بديت بنشر القسم الأول اللي هو يفسر:
فاش فشلو السياسيين التقليديين من 2011 لليوم؟ كيفاش نفهمو التركيبة النفسية للتوانسة في تعاملهم مع السياسة والشأن العام ليوم؟ كيفاش نفهمو ظاهرة قيس سعيد وطبيعة حكمو اللي فيها محتوى الانفعال والأخلاقوية أكثر من السياسة.
قراءة طيبة ومرحبا بيكم وبمقترحاتكم.
شارك رأيك