بالمناسبة، مناسبة مثول الأستاذ المحامي أحمد صواب القاضي الإداري المتقاعد يوم الجمعة 31 أكتوبر 2025 في المحكمة بتهمة خطيرة، أنزل لزهر الضاوي شاعر الجنوب القصيدة التالية بعنوان: “يابلاد…ضاع صوابها…؟؟؟”
“يابلاد ضاع صوابها
من يوم شدوا “صوابها”
كي شفتها ماعرفتها
ما لقيت فيها اصحابها
جبت الصور صفُفتها
من بابها لمحرابها
من بحرها لترابها
بسهولها بهضابها
بسحابها بضبابها
فتشتها بربشتها
ضاعت عليّا ألقابها
غاب العقل والمنطق
وتلعثمت في جوابها
تشوف العجب ماتصدّق
ماتدري شنهو صابها
من شيبها لشبابها
تاهت.. وضاع صوابها..؟؟!!
يعوي عليها ذيبها
وينعق عليها غرابها
عملوا على تعطيبها
وكثرت عليها أعطابها
واللي جابوه “طبيبها”
زاد دمرلها أعصابها..؟!!
ومن هو اللي صار “حبيبها”..؟؟
“قوُاداها وصبُابها”..!!
عالمنبر هوّخطيبها
وعالحبس.. راحوا أقطابها..؟!!
يتشكُوا من ترهيبها
وهوما سبب ارهابها
يبكوا على تعذيبها
وهوما سبب عذابها
يحكوا على تشييدها
ويجروا على خرابها
وما خلّوا حاجة تفيدها
بالزفت”.. دهنوا بابها”
وغطُوا على أيام عيدها
بايام اغتصابها..؟!!
..يا اميمتي اللي عشقتها
وين راح ريح “سخابها”..؟
يادمعتي اللي ذرفتها
وماعرفت شنهي اسبابها..؟
والله ماجيت نلومها..
وجايب ليها مشمومها
طوُل عليُا نومها..
متحيُر من غيابها..؟؟
..نا جيت نقرى همومها
في وجه “احمدصوابها”..!!
يا بلاد.. ضاع صوابها…؟؟؟”.
( قفصة 25/10/30)
شارك رأيك