تحيا الصحة العمومية في تونس!! هذا ما قاله د. سوقي في لحظات مؤثرة..
الحمد لله.. كل شيء على ما يرام..
كل الشكر والتقدير لرئيس قسم القلب بالرابطة، بجانب كلية الطب بتونس العريقة.. اين يُدَرًسْ فيها البروفيسور سامي مورالي.. والبروفيسورة سناء والي (محظوظين من درسوا عندهم في كلية الطب بتونس).. اللي قاموا بإنقاذ زميلنا الطبيب د. أحمد سوقي.. ورغم اختلافنا معه في بعض مواقفه (وهو يعرف د. سوقي قدا من مرة ننقدو على موقف معين، و الجميل في الامر، انو يقبل نقاشي بكل رحابة صدر عكس بعض الزملاء).. إلا أننا لا بد من ان نتمنى الشفاء العاجل لزميلنا العزيز بعد نجاح عمليته..
باش نبسطولكم التشخيص متاعو بلهجتنا التونسية.. الدكتور صارتلو عدم انتظام في دقات القلب (ACFA).. وعملولو عملية كَيْ بالكهرباء متطورة برشا (ablation par électroporation) باش يركحولو الدقات وترجع مريقلة.. و ما اكتفاوش بهذا اطباؤنا.. و كي ثبتو اكثر، لقاو عرق من العروق الكبار متاع القلب مسدود على اللخر (obstruction serrée subocclusive de l’IVA).. يعني بداية جلطة في القلب!!! ياخي سرحوهولو وحطولو تسريح (stent).. والحمد لله عضلة القلب تجاوبت بالباهي وكفاءة ضخ الدم طلعت من 24% البارح لـ 40% اليوم!!! رقم معجزة!!
الميكانيزم متاع الشي هذا يصير كي العروق تتسد بالشحم وتتصلب.. والقلب يولي يخدم في الفاضي وما يوصلش الدم بالقدى.. الأسباب تنجم تكون من الstress.. الخدمة برشا والضغط.. الماكلة الموش صحية.. الدخان.. وإلا قلة الحركة.. والوقاية ساهلة وممكنة.. لازمنا نبعدو على القلق.. ناكلو ماكلة نظيفة.. نراقبو السكر والدم.. ونعملو شوية sport ونتحركو..
راهو الطبيب في اللخر يقعد بشر كيف الناس الكل.. ينجم يكون مريض ويطيح كيما أي إنسان عادي.. وكم من طبيب مريض في بلادنا يخدم ويداوي في الناس وهو يعاني في صمت وواقف على ساقيه بالسيف باش يمنع غيرو!!
في الأخير.. نحب نثمن ونفتخر برشا بالطب في تونس وبكفاءاتنا الطبية اللي ديما في الموعد.. عكس بعض الزملاء في ألمانيا.. و ناكد على كلمة البعض دون تعميم وهم اقلية في الأخير.. واللي ما حبوش يخدموا في تونس بتعلة نقص الامكانيات ولو انها اصبحت شبه متوفرة بالكامل الان.. وقاعدين يتهكموا ويتنمروا على ما قاله د. سوقي الأسبوع الفارط في محنته في مستشفى ألمانيا أين لم يجد التشخيص المناسب لحالته وبقى يعاني.. في الاخير، تونس تقعد ديما ولادة وكفاءاتها ترفع الراس..
نتمنى لك الشفاء العاجل دكتور سوقي و محنة وتتعدى انشاء الله!
برا إن شاء الله نهاركم زين..”.
شارك رأيك