في غياب الحكومة و أعضائها في جلسة مساءلة، كانت اليوم كما يلي كلمة النائب ألفة مرواني:
“قلنا كل شي. حكينا في كل شي. نبهنا. وجهنا. عاركنا. عيطنا. ما نفع شي. “صم بكم عمي فهم لا يعقلون”.
قلنا هاذي حكومة فاشلة بامتياز. قلنا هاذوما وزراء من ورق. قلنا المشاكل قاعدة تتراكم والحلول ما ثماش. قلنا الأوضاع الكل متردية على جميع الأصعدة: سياسيا، اقتصاديا، اجتماعيا،.. ولا من مجيب. لا حياة لمن تنادي.
قلنا انو الدولة يلزم تكون بعيدة عن الشعارات الفارغة والشعبوية الفضفاضة. لكن في الواقع ما ثمة كان الشعارات والكلام الفضفاض و التوانسة ما يحبوش يسمعو على الفرزدق و جرير لكن يحبو حلول آنية !
كيف رئيسة حكومة ترفض الحضور في جلسات مناقشة الميزانية وترفض الحوار المباشر مع نواب الشعب. وتزيد تعلق أنشطة الحكومة في البرلمان في ظرف اقتصادي واجتماعي دقيق.. من غير حتى موقف استنكار أو تنديد من مجلس النواب. وقتها بالحق ندعو الوخيان المسؤولين على قصان الضو انو يقصو الضو ع المجلس هذا.
وينو مشروع قانون تعديل المرسوم 54؟ المحكمة الدستورية؟ قانون تجريم التطبيع؟ ما يتعدى شي كان المصادقة على القروض لين ولينا منعوتين بـ “مجلس القروض”.
تي ما هو يقصو الضو عل ها المجلس خير !!”.
شارك رأيك