أثار مشهد الفتاة المراهقة التي صعدت ركح المهرجان الدولي ببنزرت لتقبل، باكية، الفنان الشامي، جدلا واسعا على صفحات التواصل الإجتماعي اذ هناك من قبل المشهد مراعيا عمر الفتاة المحبة للفنان و هناك من قال في الطفلة ما قال بكلام مقزز من الصنف الذكوري و … و…، و من بين من دافع بكل جوارحه عن المراهقة وهم كثيرون أيضا، الممثلة القديرة سوسن معالج التي نشرت اليوم التدوينة التالية:
شوف إيجا نقلّكم !
الشامي مطرب شباب مزيان ماشالله عليه ، أغانيه رومانسية تحرّك عواطف الشباب ، هادئ في حواراته ، و عندو شوية خجل زايد فيه الشطر
و انتوما شبيكم تفحّلو ع الولد و على فانزاتو ؟
أمر عادي عادي جدا ، شخصية فنية تذكرنا بشخصية عبدالحليم وقت الي مازال كي طلع في زمن آخر ، ولا مغنيين البويز باند في التسعينات ، ولا راغب علامة كي طلع ولا باتريك برويال ولا كورت كوباين ، ولاّ أي فنان شباب مسرار رومانسي يعشقوه الشباب والمراهقات .
شبيكم تغزّلو انتوما علاش ؟!
مالقيتش تفسير بصراحة للحقد هذا الكل بخلاف الدعششة و الرجعية التي تمكنت من عقول العرب و ما أنتجته من عداء لمظاهر الحب و الفرح و الجمال و الشباب
حاجة أخرى بالله !
شبي كيف طلعت هيفاء و نانسي و روبي ( الي الشامي يفوتهم باااارشة فنيا )
الرجال الكل عشقت فيهم ؟! و نساهم زادا !
بصغارهم بكبارهم ؟؟
جاو الشباب قالولكم إحشمو على عماركم و قتها ؟!
ولا خاطر الأمر يتعلق بالفتيات فيما يخص الشامي؟
من وقتاش عشق الفنانات مباح و عشق الفنانين لا يجوز ؟!
إحشمو شوية بربي ، و سيبو الشبيبة تعيش و تعشق
و تحلم كيما عملتو انتوما كيف كنتو في أعمارهم !
ياخي شنوّا حضرتولها الشبيبة العربية سامحوني ؟
شنوّا بنيتولهم ؟
ولاشنوا أسّستو باش تنصّبو رواحكم اليوم أوصياء على أذواقهم و أخلاقهم و أحلامهم ؟؟
نفاق عابر للمجرّات
PS :
لست من متابعات الفنان المذكور أعلاه ، موجة الهلع متاعكم خلاتني نمشي نبحث عليه . زيدو غزّلو عليه وهو يزيد شهرة وانتشار و عشاقو يزيدوه متابعة و دعم
*الوليّد يستحق كل خير بصراحة”.
شارك رأيك