![](http://www.kapitalis.com/anbaa-tounes/wp-content/uploads/2022/03/نزار-الشعري.jpg)
حملة النقد التي يتعرض لها منذ يومين على صفحات التواصل الإجتماعي بسبب صور توثق منهجه السياسي، يرد عليها نزار الشعري المعني بالموضوع مساء اليوم الجمعة 18 مارس 2022 كما يلي واصفا إياها بثقافة الهدم و التنبير:
“في الصور تحية اشبال تونس وانا معاهم كانت للراية الوطنية وللقائد حنبعل ابن ارض تونس الي زحف في يوم ما على اقوى امبراطورية في العالم وكتب ملاحم يشهد ليها العالم لليوم
الشباب الي سنين وهوما يزرعوا فيه عقلية السلبية والتنبير والاحباط في عقلية تونس بلد التسول و تونس بلاد صغيرة لا تخبش لا ادبش والفقر مكتوب علينا والتخلف مكتوب علينا …احنا نحبو نزعوا فيه عقلية اخرى عقلية الاعتزاز ببلاده والايمان اني تونس بلاد الرجال والحضارة بلاد كان يتحسب ليها الف حساب وانهم هوما جيشها الي باش يرجع مجدها واعاود يبنيها ويعلي رايتها وانو مجد تونس لازم يرجع .
شباب تونس من سنين شكون استثمر فيه وشكون حكا معاه وشكون تحرك باش يزرع فيه عقلية العمل والايمان بالذات وبالقدرة على تغيير الواقع مهما كان صعيب شكون الي استثمر في شبابنا ومحبيناش نعاونوه.
الي يعتقد انو العمل هذا بدينا نقوموا بيه البارح لغايات سياسية غالط طول وعرض، العمل هذا نقوموا بيهبيه عندنا سنين من 2012 على حساب الوقت والعائلة والخدمة وكلنا فخر واعتزاز، ونفرحوا كي نشوفوا غيرنا يمشي في نفس التوجه ويستثمر في شباب تونس واشبالها ويحاول يزرع فيهم عقلية البناء والامل ونفرحوا كي نشوفوا اولدنا يشقوا طريق نجاح واكونوا حتى خير منا ويعملوا الي ما عملناهوش.
البناء فعل صعيب برشة والعمل فعل صعيب برشة زراعة الامل فعل صعيب برشة …نقاش الافكار فعل صعيب برشة .. لكن ثقافة الهدم والتنبير ونقد النوايا هي اسهل شيء ممكن”.
شارك رأيك