” صديقنا المحامي رمزي الجبابلي، راجل وهب حياتو للثقافة في الجهة متاعو (الكاف) وعمل بمجهوده الخاص خدمة كان شايخ عليها وخدمها ببرشة محبّة وبرشة كيف وممكن هاذاكا علاش نجح فيما فشلت فيه الدولة على مدى عقود..
“رمزي الجبابلي نتبع في الخدمة متاعو بإعجاب منذ سنوات، هو -للي ما يعرفوهش- إلّي أطلق بمجهود خرافي مهرجان السيكادجاز في الكاف تقريبا من لا شيء وجعل منه دورة بعد دورة مهرجان دولي ناجح وحدث وطني تمشيلو الناس من مختلف جهات البلاد، وعمل زادة تظاهرة Les Montagnes Accoustiques في الموقع التاريخي متاع مائدة يوغرطة..
“كل مرة قعدت فيها مع رمزي كان يحكيلي كيفاش كل عام يتحارب مع بيروقراطية وزارة الثقافة ومع المستشهرين والداعمين وكل عام يكرّهوه في روحو و يشارف على الدخول للحبس ويعطي شيكات شخصيّة باش ينجّح الفستيفال وكل عام تسلك في آخر لحظة بالصلاة ولا بالتكربيص.. الحقيقة كنت نعتبر أنه شغل متاع كاميكاز يعمل فيه في بلادنا الجاحدة إلي عمرها ما كانت ترى بالخير، لكني كنت أحترم كثيرا الشغف والصدق متاعو..
“رمزي عمل هذا الكل في سبيل الكاف ولأنه يؤمن بقيمة وأهمية الثقافة، وعملو بتضحيات كبيرة على حساب خدمتو وصحّتو وعايلتو ونجح فيه حيث فشل أو تقاعس آخرون وتألّقو بغيابهم..
“رمزي الجبابلي اليوم ونقلا عن صديقنا الأستاذ Seif Allah Ben Meftah يقبع في السجن منذ يوم الجمعة بسبب شيكات ضمان أعطاها بإسمه الخاص باش ينجّح المهرجان في إنتظار الدعم المستحق من وزارة الثقافة الذي لم يأتي!!
“كل من يعرف رمزي الجبابلي من قريب أو بعيد يعرف أنه كل يوم يقضيه في السجن هو عار ما بعده عار على البلاد هاذي وعلى حكّامها وعلى وزارة الثقافة وعلى الدولة وعلى رجال الكاف تحديدا وعلى كل شخص ما ياقفش معاه في هاته المحنة..
الحرية للأستاذ رمزي الجبابلي
الثقافة ليست جريمة
خيرا تعمل شرا تلقى
وينكم يا رجال الكاف آقفو لولد بلادكم
Siccaveneria SiccaJazz Ramzi Jebabli”.
شارك رأيك