طوبال للسياسيين”مطيّشين مصلحة تونس و يتعاركوا على كرسي حماّم ما يسواش”

نشرت الممثلة المسرحية ليلى طوبال تدوينة على صفحتها الخاصة بموقع التواصل الاجتماعي”الفايسبوك” عبرت ضمنها من الوضع السياسي الحالي.

وفيما يلي نص التدوينة:

ثمّة حاجة تعدّات للعباد حبّ من حبّ وكره من كره… العباد إلّي قلوبها طابت وحياتها مرارت مالهم والمشاكل وخيانة السياسيين… إي خيانة السياسيين إلّي مطيّشين مصلحة تونس على طول يديهم و يتعاركوا على كرسي حماّم ما يسواش… القلوب متاع العباد طابت ودمّلت … الناس ولاّت تمشي هايمة… مدبرمة… مأيّسة… رانا بعد آك الأيامات متاع 14 / 15 /16 / 17 /18 جانفي 2011 ما فرحناش… كل شيّ فينا حفى … ساقينا.. وقلوبنا وآمالنا واحلامنا وحتى دموعنا حفات على ما بكينا عالأعزاز إلّي خطفوهم منّا… كل يوم تحسّ إلّي بلادك قاعدة تضيع منّك … وتتقهر على خاطر منين تتلفت تلقاها كعكة وما عند عندك ثقة في حتى حدّ… إرهاب تهريب عصابات تسريبات أزمات… اليوم صارت رجّة في البلاد… اليوم فمّة راجل اختار تونس وخلّى التوانسة تاقف معاه ـ معاه موش وراه ـ … الناس إلّي نرى فيهم اليوم تساند في يوسف الشاهد مواطنات ومواطنين جمعتنا المسيرات إلّي أطاحت ببن علي… والمسيرات واعتصام الرحيل إلّي أطاح بالنهضة… ناس ما عندها حتى حسابات وعقابات و ماهي طامعة في شيّ… كان تشوف تونس لاباس… ناس محتاجين … مشتاقين … عطشانين لراجل يقول اخترت تونس… الراجل هذا اسمو يوسف الشاهد