“88.34% من التوانسة ما شاركوش في الانتخابات.رقم قياسي عالمي جديد في نسب المشاركة “الرسمية” لا حصل قبل على حد علمي لا في الهند ولا السند في تاريخ البشرية…11.66%

“الواضح أنها النسب الهزيلة جدا وعلى فرض صحتها تورينا مرة أخرى بوضوح شديد عدم قبول أغلبية ساحقة جدا من التوانسة لتوجهات قيس سعيد…
“فيما يتعلق ببدعة البناء “الفوضوي” القاعدي وفيما يتعلق بالفشل في إدارة الدولة والقيام بإصلاحات حقيقية….
تبين النسب المعلنة أنها أغلبية كبيرة برشه 88.34 % من الناخبين التوانسة ماهيش منخرطة رغم أنها تفضل الصمت حاليا…
“لكنها ما تتحركش لأنها ما تراش بديل مقنع متوفرلها حاليا….
من جهة أخرى النسب الهزلية هاذي تبين المسؤولية الواضحة والجلية لما يسمى بهيئة الانتخابات في التدني الفاضح لنسب المشاركة منذ الإستفتاء على الدستور.
“الناس الي يفهمو في الانتخابات يفهمو على شنوة قاعد نحكي بالضبط.
“سبق أني تنبأت بلي صاير الكل… وبينتو ونبهت منو وتعديت على أساسو للمحاكم وما زلت نتحاكم لأني قلت الحقيقة للشعب التونسي…
“الي حذرت منو الكل تحقق بالحرف..وعيب على كل المطبلين الي قاعدين يقولو فيه…
يغلطو في الشعب…
تعرفو الي العامل الأساسي في الانتخابات في أي دولة في العالم هو عامل الثقة…
الثقة في الدولة وفي مؤسساتها وفي الإدارة الانتخابية…
الثقة في الدولة أنها وظيفتها كدولة الانجاز موش الثرثرة…
” وأنها الدولة تعطي حلول وما تنددش بالنقائص وتقعد تتفرج عليهم كيفنا…
والثقة في الإدارة الانتخابية…أنها مستقلة ومحايدة وماهيش متذيلة للسلطة ولا تعمللها في حملة تفسيرية…
وقت تتوفر الثقة ينعكس هذا على النتائج وعلى المشاركة قبل كل شيء الي ترتفع…
ويتم القبول بسهولة بصحة النتائج المعلن عنها…
“تضربتش الثقة…
وهي مضروبة تماما اليوم…
تتضرب أول حاجة المشاركة الشعبية…
الشعب التونسي ماهوش شعب أبله…
هو شعب ذكي جدا صدقوني…
تاريخيا عاقب كل من حاول يعديها عليه… وارجعو للإحصائيات من 2011…
في كل انتخابات لازم يعاقب حد…
الي نراو فيه هو تصويت عقابي كان نجمنا نستعملو العبارة لأنو ما فماش تقريبا تصويت…
وما فماش نجاح ولا شيء…لأنها الانتخابات هاذي تمثل فشل ذريع… وتمثل كارثة على الميزانية العمومية…
ضربة قوية لأي شرعية ومشروعية…
الي ريناه اليوم هو أكثر من التصويت العقابي…هو عمل سياسي عقابي لا شك فيه للمرة الثالثة على التوالي…هو مسمار ٱخر في نعش منظومة فاشلة ورديئة لا أكثر وعلى أقل…”.

ظهرت المقالة محلية/ سامي بن سلامة: “88.34 % من التوانسة ما شاركوش في الانتخابات” أولاً على أنباء تونس.

الوزير الأسبق للشغل فوزي بن عبد الرحمان يروي عبر تدوينة نشرها اليوم السبت على حسابه الخاص بصفحات التواصل الاجتماعي بالفايسبوك ما خطر بباله وهو يغادر “الكوشة”:

“مشيت لكوشة الحومة (عصرية الله غالب) باش نشري خبز.

ثما صف صغير و ما ثماش خبز باڨات و لا خبز سميد..
و انا في الحقيقة عندي مبدأ عام و غير قابل للنقاش : عمري ما نشد الصف على ماكلة، عمري ما شديت صف على خبز (حتى في رمضان لا) و فارينة و سميد و حليب و سكر… نخير نقعد بلاش و نلقى حلول أخرى و خاصة كيف واحد يرد بالو على ماكلتو.

انا في باب الخروج و مواطن ظهرلو باش يخرج و لكن قال بصوت عالي : ” عشرة سنين خربوها ما خلاو فيها شيء”

الحق الحق.. في الأول ما فهمتش آش يحب يقول.. بعد لحظات البهتة الوجودية و بعد ما عاودت نوروناتي تشكلت بتركيبة أخرى تاخذ بعين الاعتبار المعطيات المحلية، فهمت اللي السيد (واللي يظهر عندو مستوى محترم) قال الكلام المقبول سياسيا.. و اللي هو مقتنع اللي الكلام اللي يقول فيه هو الحق (ربما.. عندي كومام شك صغير في هذا).

خرجت و انا نسأل في روحي : علاش التوانسة ما عادش تهمهم الحقيقة؟ و نسال في روحي في سؤال أخطر برشا : تي بالكشي هوما الصحاح و انا الغالط؟ راهو المنطق يقول اللي ما نجموش نكونو مختلفين هكا متاع 180 درجة متاع ناس في الشرق و ناس في الغرب؟

عندي صديق من أصدقائي و اللي عندو راي نعتد بيه برشا قال لي :”الحقيقة تغيبها العاطفة”..

آش معناها ؟ باش انجمو نعيشو في ها البلاد شنوا يلزم ؟ ما عادش نفكرو؟ باهي نغيبو العقل إي و الحرية ؟ آش نعملو في الحرية؟ إي حرية التفكير متاع الصادقين!

لا انا مانيش شادد الصف. موش توا باش نبدا… كل واحد حر في شدانو للصف.

و كانك على مرقة الخضرة و الله بلاش خبز بنينة ياسر زادا.”.

ظهرت المقالة تونس اليوم و الصف على الخبز: بن عبد الرحمان وهو يغادر الكوشة “علاش التوانسة ما عادش تهمهم الحقيقة؟” أولاً على أنباء تونس.