و التقطنا البعض مما قيل من أصداء في مسرحية PSY و من بينهم صديق و زميلة لجعفور:
*كتب ماجد ضيف الله أحد أصدقاء جعفور ما يلي بالدارجة التونسية حول المسرحية وهي آخر عمل ركحي له بعد غياب بعض المواسم مما أثار التساؤل:

“مبارح عرض مسرحية psy لجعفور لم تكن مسرحية او عرض للضحك والكوميديا كان عرض للعلاج النفسي من مشاكل الحياة اليومية للمواطن التونسي وللامراض اللتي يعاني منها المجتمع التونسي فيها نقد للذات وجلد لها في اللاشعور واللاوعي لحظة مصارحة مع ذواتنا مع سلوكاتنا مع تصرفاتنا مع مانعيشه اليوم من تدهور للسلوك القيمي والاخلاقي .
عرض لاقى إعجاب الجمهور شكرا جعفور”.

الزميلة هبة الوصيف الصحفية بالديوان اف ام نشرت هي الأخرى قراءتها للمسرحية:

“البارح حضرت عرض الجعفور “Psy”
جعفور… الزميل، الصديق،العشير، والإنسان المثقف اللي خدمت معاه سنوات.
أما اللي شفتو البارح على الركح كان جعفور آخر… جعفور العمق، جعفور التجربة، جعفور الوجيعة اللي منها يخرج الإبداع.
من خلال العرض اكتشفت وجه آخر لجعفر. ويمكن الناس اللي عرفوه لسنوات، واللي تعودوا بيه هو صورة الجعفور “الي ديما شايخ و يضحك الناس ” سطحية مدروسة سوقها على روحو لكن ما يعرفوش قداش الصورة هاذي بعّدتو هو شوية على جعفر الحقيقي… جعفر العميق، الكاتب، المسرحي، الفنان اللي نال جوائز في العالم العربي.
حسّيت البارح إنو رجّع الروح لذاتو.
وهو بيدو قالها في الكونفرانس دو بريس: «أنا رجعت، كأني تولدت من جديد.»
وبالنسبة ليا، هاذي حاجة كبيرة برشة… إنك في لحظة توقف، تعمل pause، وتسأل روحك: شكون أنا؟ وين ماشي؟ وهل الصورة اللي الناس تشوف فيها فيا هي فعلاً أنا؟
قمة الوعي إنك ما تخليش الدنيا تسوقك. إنك تعمل pause، تسأل روحك، وإذا لزم الأمر تستعين بأهل الاختصاص باش يعاونوك ترجع للسكة الصحيحة… ترجع لذاتك.
أنا البارح ضحكت… وحبيت نبكي… على واقعنا علي نعيشو فيه من غربة على ذواتنا نقد ببرشا طريزة و فيانة أما الأهم إني خرجت من المسرحية وأنا مروّحة للدار وعندي برشة أسئلة نسأل فيهم روحي.
خاطر إحنا في حياتنا اليومية نظهروا نضحكوا، نظهروا فرحانين، عامليين جو، نصنعوا في البهجة و نسربيو في الموجات الايجابية … أما حتى حد ما يعرف شنوّة عنا من الداخل.
ساعات الدنيا تهزّنا، وتخلّينا نضيعوا شوية من روحنا. نوليوا نشبهوا هذا، ونشبهوا ذاك، ونعيشوا في الصور اللي الناس تستناها منا… حتى نلقاو رواحنا غرباء على رواحنا.
أما الأجمل، إنو رغم الوجيعة والعمق، جعفر ما خلاّناش نبكيو برشة.
كل ما يوصلنا للحظة اللي تحس فيها الجمهور باش يتأثر ويبكي… يرجع فيسع يضحكنا.

وهنا تظهر قوة جعفر الحقيقية: كيفاش يلعب على الـ émotions، وكيفاش يتحكم في الـ public متاعو.

يعرف وقتاش يوجّعك، ووقتاش يضحكك، ووقتاش يخليك تسأل روحك سؤال.
وقالها هو: «أنا نعرف نسربي جمهوري….»
والحقيقة… اللي تسربا البارح، موش كان وجيعة جعفر.
سربالنا وجيعة برشا فينا حاسيين ساكتيين مستسلميين و ماشيين بمفهوم : تي هانا عايشين بركا…محسوب وين عندك توصل .
وهاذي، بالنسبة ليا، قوة العرض الحقيقية.
جعفر جعفور صديقي الغالي فخورة بيك يا مبدع
“PSY” مراية تخليك تشوف روحك بصورة أوضح
Bravo”

ظهرت المقالة تونس: جعفور يعرض مسرحية Psy بالمركب الثقافي والرياضي بالمنزه السادس (فيديو) أولاً على أنباء تونس.