“حكيت في الستاتي الاخراني كيفاش دولة بورقيبة قراتنا بلاش وأعطاتنا فرصتنا، وكبشنا فيها بظوافرنا.
عاد يا سيدي وصلت للجامعة في اكتوبر 73, أموري مريقلة وعندي بورس وشايخ.
لكن فيسع فيسع فقت أن الفرحة ما تمتش.
وبديت نسمع في أخبار تحزن.
هاو فلان تطرد من الجامعة, هاو الاخر تشد ورماوه في الداخلية, هاو الآخر اكل طريحة من عند البوليس، شبيبة في عمر الشباب، بسبب نشاطهم السياسي.

وبعد شهرين قراية نلقى روحي مطرد كيفهم.
مدير المدرسة حب يكسر لنا اضرابنا وهد على كلاصنا يحب يدخلنا بالسيف نقراو.
وما كنتش من العاكسين وهديت عليه بهجوم معاكس وجبدته من كرافاته.
شحطني ديراكت بطرد بشهر اكهو، ذواقة متاع الشيء اللي بلش يجي من بعد.
في شهر فيفري 74, عملنا لمة كبيرة برشا في الكامبيس نحتفلوا فيها بحركة فيفري.
وهاك اللمة والاجتماع العام الضخم غيرلي حياتي تماما وقلب اهتماماتي واولوياتي جملة وتفصيلا.
قبله كنت بشير متاع ليسي سوسة، وبعده وليت بشير اخر مختلف تماما.
وتقرر وقتها نعملوا مسيرة في شوارع العاصمة نطالبوا فيها باطلاق سراح صحابنا المعتقلين وبانجاز مؤتمر الUGET ال18.
وهبطنا في شهر افريل للشوارع في مظاهرة كبيرة، ونتذكر كنت شايخ شيخة كبيرة في مخي.
أول مرة في حياتي باش نهبط نتظاهر ونعيط كيف ما نحب ونشتهي.
وأول مرة زادة في حياتي نشوف البوب وكلاب البوب.
ونهارتها دقدقونا بالضرب وعملوا فينا اللي ما يتعملش.
وآني جيت من البلاد عامتها للجامعة مع اولاد بلادي وأولاد حومتي.
فقراء مزمرين, لكن كبشنا في الفرصة اللي جاتنا ونجحنا ووصلنا للجامعة.
وهبطت للمظاهرة مع علي وعبدالحميد ومحجوب والهاشمي والبحري.
فروخ صغار عمرنا 19 عام, شايخين على جو الحرية اللي كنا محرومين منه في الليسي.
وبديت نعيط “سيبولنا صحابنا….. نحبوا مؤتمرنا….. اذا الشعب يوما”.
وتحصرنا بين شارع انجلترا وشارع اسبانيا, وهد علينا البوب بالعصي والكلاب.
وتفرقنا, وأهرب فين ما تهرب.
ونشوف في الحاكم يكركر في عبدالحميد ومحجوب وعلي والعصي تاكل فيهم ماكلة.
ليلتها, آني سترني ربي رجعت بتت في المبيت, اما صحابي ال3 في الداخلية.
ومن غدوة تتنصب لهم المحكمة ويخبطوهم ب6 شهور نافذة.
نهارتها عرفت أن الحرية اللي كنت نحلم بيها في الليسي, ياخذوها منك بعصى وكلب.
ومن نهارتها، وليت نقدر حاجة اكثر من اي شيء اخر في حياتي، واكثر حتى من قرايتي ونجاحي:
الحرية والكرامة والراس المرفوع لفوق، والصحاب والصحيبات اللي وليت تتقاسم معهم عشق القيم والمبادئ.

وعمري ما ننسى نهار اللي جاو الشياب أباء صحابي من البلاد للعاصمة يلوجوا على أولادهم وهوما ما يعرفوش تونس.
وآني ندور بيهم من مركز لمركز والسب فينا والكلام الخايب.
في جوان, خرجوا من الحبس وهربوا يجريوا لفرنسا باش يكملوا قرايتهم.
أما آني قعدت في الجامعة في تونس نحاول نكمل قرايتي وناخذ شهادتي
لكن المخ تبدل وصار يغلي كيف الطنجرة، وصار النشاط السياسي والنضال ضد الدولة وحزبها في نفس المستوى تقريبا مع القراية.
وبمحض ارادتي دخلت للهياكل النقابية المؤقتة ديراكت بعد المظاهرة، وما كملت العام كان ما انتظمت في بارسباكتيف/العامل التونسي.
لاني صارت عندي رغبة ملحة جدا صعيب مقاومتها في ان يكون لي هيكل او تنظيم يضمني وانشط فيه بحرية مع ناس يشاطروني رغبتي.

ونهار بعد اربعة سنين كاملين من ذاك اليوم، بابا قاعد في البلاد, يجيه جواب من وزير التربية (مزالي).
فيه زوز سطور اكهو:
“تقرر طرد ابنكم نهائيا من كل المؤسسات الجامعية”.
وفي هاك الاربعة او الخمسة سنين اللي سبقو الجواب هذا، عدد المحاكمات السياسية اللي عشتها وفرضت علينا سطوتها كان حاجة ترعب.
وعدد الطلبة اللي تطردو او تم تجنيدهم قسرا قبلي ومعايا وبعدي بلغ ارقام مهولة.

هذه بقية حكاية واحد اسمه بشير من جيل الاستقلال, مع الاستقلال ودولة الاستقلال.
جيل الفرحة اللي ما تمتش, وسرقوها منه بماتراك وكلاب berger.

ظهرت المقالة بقية حكاية “الطالب بشير مع الاستقلال” أولاً على أنباء تونس.

“حكاية طالب تونسي ابن دولة الاستقلال :

حكاية “بشير” جمعة مع الاستقلال

وقت استقلت تونس كان عمري عامين.
ووقتها اللي كان ينزاد له ولد ذكر, يا يسميه حبيب يا فرحات يا بشير يا صالح.
أسامي المصلحين وزعماء الحركة الوطنية في هاك الزمان.
هيا سيدي سماوني “بشير” وما فهمت الاسم هذا كان كيف نهار شفت شارع باسم البشير صفر.
وبشير هذا اللي هو آني, دخل يقرأ عام 60, وكمل قرايته عام 78.
18 عام كاملين يا بوقلب وهو يقرأ, وعمره لا دفع فرنك.
في الابتدائي, يأخذ الكتب بلاش, والكرارس بلاش, ويأكل بلاش, 6 سنين كاملين.
وفي الثانوي, كيف كيف زيد عليهم السكنى في التضامن الاجتماعي متاع سوسة بلاش, 7 سنين بالتمام والكمال.
ونجحت في الباك عام 73 ومشيت للجامعة في العاصمة.
هيا قدمت الدوسي متاعي هاك الصيف لديوان الشؤون الجامعية وقعدت نستنى في رحمة ربي.
وشديت صيف كامل نخدم في المرمة والصبات باش ندبر مريشنة نمشي بيها لتونس.
وفى الصيف وما جاني شيء, وصحابي اللي نجحوا معايا من البلاد أمورهم مريقلة وجاتهم الموافقة على الاختصاص اللي حبوه.
ومعاه بورس ب20 دينار كل شهر.
وآني نتعصر وخايف شنية الحكاية, وموش ساهل تمشي من ريف الساحل للعاصمة في هاك الوقت.
هيا نهار هزني “عم حسن” اللواجيست للعاصمة, وقال لي ما تروح الا ما تريقل أمورك وتحل المشكلة.
والملقى ال4 متاع العشية في “قاراج اللوح” باش نروح بيك للبلاد.
وهبطني عم حسن في الفجاري في قاراج اللوح, وبقدرة قادر وصلت لديوان الشؤون الجامعية.
في ساقيا شلاكة بوصبع, وفي جيبي 500 فرنك.
حل الديوان ال8, وقابلت راجل كبير “عم الطيب”, لتوا نترحم عليه قد ما هو طيب.
ومدلي الدوسي متاعي وقال لي “برا هزه لسي عبيد البشراوي في دار المعلمين العليا”.
هيا وصلت بقدرة قادر لدار المعلمين العليا في السنتارين.
نلقى حاجة بدعة وقعدت حال فمي. آش بنات وآش اولاد مزيانين ولابسين وقد وزين ووهرة.
قابلت سي عبيد, اللي فرح بيا وسألني “شنوة تحب تقرأ”.
قلت له “أنجليزية”.
نادى لسي حسن اللي هزني لبيرو وسجلني في لحظتها ومدلي بطاقة طالب.
ومن بعد ركبوني مع طلبة أخرين في كار وهزوني لمبيت ميتيالفيل باش نختار شامبري.
واخترت الشامبري متاعي مع واحد لقيته صدفة جاي من صفاقس وتوا أعز صديق ليا في حياتي.
ومن بعد رجعونا لENS في باردو, ومشيت عاودت قابلت سي حسن.
مدلي بونو وقال لي برا أمشي للمحاسب, ومعاه ticket وقال لي برا للريفاكتوار تغدى.
وقت مشيت للمحاسب, مدلي 35 دينار بورس شهر سبتمبر, و40 دينار مصاريف كتب وما لازمه للقراية.
من دوختي, اول ردة فعل متاعي هي أني خزرت للشلاكة بوصبع, وقلتلها “اليوم نهارك يا بنت الكلب”.
وقت دخلت للريفاكتوار باش نتغدى وشفت الماكلة, أول حاجة فكرت فيها كيفاش باش نوصف الماكلة للوالدة وتصدقني.
بعد الغداء هبطت لشارل ديغول وشريت شبادري روعة (شماتة في الشلاكة بوصبع), وسروال دجين وسورية وشيخت روحي.
ومشيت لقاراج اللوح نستنى في عم حسن.
وقت وصل وشافني وسمع حكايتي, عمري ما ننسى دمعاته في عينيه من الفرحة.
طلعت لتونس ب500 فرنك في جيبي وشلاكة بوصبع.
روحت منها ب80 دينار وسبادري قمقوم.
و20 دينار للوالد الله يرحمه.

هذه حكاية بشير ولد جيل الاستقلال.
اللي كبر على “يحيا بورقيبا”.

ظهرت المقالة بالمناسبة: حكاية بشير جمعة مع الاستقلال، ترند اليوم بدون منازع أولاً على أنباء تونس.