ونشبت مشادة كلامية حادة بين بية الزردي وبين الاعلامي إلياس الغربي الذي هاجمها وكتب صحيح ان الـplateaux poubelle هوما أفضل مدرسة..قسوات”، في حين ردت عليه بية الزردي وكتبت “على وجهك بوبال “..فأجابها انت “ايقونة تلفزة وإذاعة الـ pubelle ” ..الانتقادات لم تقف هنا بل هاجمت الاعلامية الرياضية عايدة عرب بية الزردي وكتبت تدوينة مطولة جاء فيها ما يلي:

3إنك تسمح لنفسك تتطاول على معهد الصحافة فهذا غير مقبول! عزيزتي بيّة الزردي؛ معهد الصحافة خط أحمر!

ولمعلوماتك و لثقافتك العامة المفقودة: وقت إلي خذيت أنا البكالوريا على سبيل المثال و ليس الحصر، كان باش تدخل للمعهد الصحافة يلزم تكون ماخو الفرنسية option و جايب فيها معدل قوي في الامتحان النهائي، هي و الانجليزية إلى جانب معدلك العام الّي يلزم يكون محترم!

عزيزتي، معهد الصحافة خرّج دكاترة و نساء و رجال تقلدّو مهام عليا في الدولة و أيضا خارجها.

أساتذة معهد الصحافة و علوم الاخبار الّي هوما متخرجين من نفس المعد مطلوبين في أهم كليات الصحافة العربية للتدريس و مراجع في مجالهم وفما منهم الّي كاتبين آلاف المقالات العلمية و عشرات الكتب ….

صديقتي ننصحك نصيحة وسْع؛ خلّيك فلّي تعرفو و متمكّنة منّو و ما تتعلطّش على ما تجهلين و ما أكثر ما تجهلين!

عزيزتي بية؛ وقتلّي تكون قريت 3 سنين بعد السيزيام بريمار شعبة قصيرة مهنيّة إلّي هي الخياطة، و إلّي انت عمرك ما ذكرتها و يبدو تستعار منها في حين الخياطة مهنة شريفة و متاع ذوق كبير، و دخلت مجال التنشيط الإذاعي بالصدفة، و من بعد التَكْرِنّيك في تلفزة الأفكار لأن من هب و دب ولّى كرونيكور لأسباب متعلّقة بمسألة وحيدة هي البوز، و انت ما شاء الله ابدعت في العرك و المعروك و شريان الشبوك و سبان الناس،

أما رد بالك تستخايل ولو لثانية الّي هذا يعطيك الحق و الشرعية و المشروعية باش تتْحكحك على معهد الصحافة و ما ادراك و خرّيجيه خاطر وقتها تولّي تحط روحك في موقف بايخ جدّا و وقتها تلقانا بالمرصاد خاطر معهد الصحافة دارنا و عايلتنا و تكويننا و فخرنا و مرجعنا و أساتذتنا العمالقة إلّي قرّاونا و ورّاونا و علمونا المهنة و أخلاقياتها و إلّي انت، سامحني نقلك بكل صراحة ما عندك حتّى صلة بها!

فبحيث، خلّيك منشطة، كرونيكوز، انستاڤراموز و لقّط على رويحتك خبيزتك و فك عليك مناّ، رانا ما فينا ما يتفصّل كيف تجبدنا و خاصة تجبد معهدنا!”

يٌشار إلى أن صلاح الدين الدريدي ،استاذ في الصحافة والاخبار، ساند أيضا “غضب” الصحفيين من تصريحات بيّة الزردي وكتب تدوينة مساندة لهم واصفا ايها ب” مذيعة الربط”، من جانبها كتبت نعيمة منصور شرميطي رئيسى تحرير موقع آرابسك تدوينة حملت عنوان “بية الزردي البذيئة والعدائية”ن معتبرة ان ما قامت به بيّة هو مغالطة للرأي العام” مضيفة “لحق راك عملت العار يا مادام، راهو تنجم تعبر على رأيك من غير ما تجرح و تثلب الناس و الخلق …”

وامام هذا الكم الهائل من الانتقادات قدمت بية الزردي اليوم على موجات نفس الاذاعة وخلال برنامجها “وقيت مع بية” إعتذارها للصحفيين ولخريجي معهد الصحافة معتبرة ان “الاعتذار من شيم الكبار”، مشيرة إلى انهم “عائلتها” .

ظهرت المقالة وصفوها بـ”العدائية وبمذيعة الربط” وانتقدوا مستواها التعليمي “3 سنين بعد السيزيام”: بية الزردي في مرمى غضب الصحفيين وهي تعتذر (فيديو) أولاً على أنباء تونس.