الشاعر الشعبي لزهر الضاوي نشر على صفحته الفايسبوك قصيدا في رثاء المناضل اليساري التونسي الكبير جيلبار نقاش الذي وافته المنية أمس الأحد 26 ديسمبر 2020 بإحدى مستشفيات باريس بعد صراع طويل مع المرض.

يا تاريخ طْويل… حافل نضالات..

“فْلايك بيضة” تسير… ف ْواد الذكريات..

سَلامي نهديه للمناضلين… اللي عشقوا الحرية من أول الستينات …

ورسموا لينا طْريق… وساروا وسرنا فيه…

ونلقى روحي نسير… وراه هوّ بالذات…

واسمو… جاني” غْريب”… قالولي.. “جيلبار”…

وكي طلبت “التعريب” قالولي.. “نقّاش”…

وجُرْحو عليه منقوش في سجن الاشرار…

وكي قالولو توب… جاوبهم .. “هيهات”…

وفَ “احباس التعذيب”… ومن خلف الأسوار…

نارو ضد”الظلم… قعدت ماتطفاش…

وحروف النضال…على باكو “كريستال”…

مكتوبة بالدم… طلعت ما روهاش…

مشات ل”باب سعدون”.,. عقلوها العمال…

ووصات للطلاب..قروها ومانسوهاش…

وجانا “عهد جْديد”… وما قْبِل “التعويض”…

وحُبّو ديمة يزيد لتونس ما يوفاش…

ورْفَضْ “التمجيد”… وما حبّش يحيد…

وما يبيع “النضال”… كان الْ مايسواش…

وقرّرْت الرحيل… والطّريق طْويل…

و”مسك الليل” يميل ودموعو رشراش…

لواه هكة يا “كبير”… ترحل يا نقّاش…

ومازال المَسير… والطريق ما وفاش…

با تاريخ كبير… حافل نضالات…

فلايك بيضة تسير…ف واد الذكريات…

ظهرت المقالة سلام… جيلبار نقاش ! أولاً على أنباء تونس.