قصيد الشاعر الشعبي لزهر الضاوي المنشور أسفله بعنوان “حرب البسوس” مستوحي من “الحرب العروشية” أو الصدام القبلي الدائر رحاه منذ أيام في بني خداش و دوز الشمالية في الصحراء التونسية… و ذلك في إطار نزاع عن ملكية أرض إشتراكية. هكذا تنتهي الثورات و تدمر الدول…

بقلم لزهر الضاوي

واللهْ.. قَوّيناها ” الثورة”..
الّلين دُرنا على ارْواحنا..؟!!
وطَلّعناها فْ أبهى صورة..
كيف خْلينا اجْباحْنا..!!
ودِرْناها الحَمْلة.. الوراء الحَمْلة..
والجرحى صاروا بالجملة..
وعَلْ جال “كْواديس الرملة”..
تِقْتلْنا.. بِسْلاحنا..؟؟!!
على صحراء في برّ مشوم..
خالي .. يُغْرِد فيه البوم…
طْفُل صغير.. فْ د مّو يعوم..
من الجهل اللي اجتاحنا….؟؟!!
طفل صغير.. ودمو ساح..
يتبطّش.. فوق الضحضاح..
وليل الظلمة علينا طاح..
وقعدت كان أشباحنا..؟!!
وفي عشرة سنين دمّرناها..
كانت دولة.. فككناها..
وغدوة.. مع “البدْر” اللي خْلاها..
نحتفلو.. ” بنْجاحْنا “..؟؟!!
و”ياربي تبارك وتزيد”…
واش “يريد الشعب ..يريد”..!!
ومن غير ما يجينا “الكوفيد”..
هانا قتلنا ارواحنا…؟!!
هانا قتلنا ارواحنا..؟!!!

ظهرت المقالة من وحي حرب البسوس: كانت دولة… وفي عشرة سنين دمّرناها ! أولاً على أنباء تونس.