في هذا القصيد الساخر شاعر قفصة الكبير يسخر من سلوك قادة حركة النهضة الإسلامية الذين تنادوا لمطالبة الولايات المتحدة بالضغط على الرئيس قيس سعيد لأنه استجاب لمطالب الشعب بتجميد البرلمان و إقالة رئيس الحكومة الذي كان دمية بين أيدي الإخوان المسلمين.

شعر لزهر الضاوي

“صبايحية”… “صبايحية”… “صبايحيةْ” آخر زمان…

متاع فرانسا قعدوا لتالي… وجونا متاع الماريكان…

ينادوا على “بايدن” بالعالي…”بايدن” يا “عظيم الشان”…

يا “عمي” إنت… يا”خالي”… يامتاع “حْقوق الإنسان”…

يا “خونا” “ما عنّا والي”… إرحمنا رانا “اخوان”..,

إرحمنا رانا “الرعية” وجار علينا ها “السلطان”…

و”تونسْهم” هاذي “مدعيّة”… ما صارت تقبل “خِيّان”…

وتحكي باسم “المشروعية”… وصارت تكفر ب “الرجعية”

عجّل… رُدّلْنا “الشرعية”.. ورجّع لينا “البرلمان”…

صبايحية”.,.”صبايحية”… يا “بايدن” رد التحية..,

يرضيك نروحو ضحية… و”الشعب المارق” يطمان…

واحنا أقسمنا على خلاها… واغتلْنا أعز أبناها…

ومستحيل تموت بداها… الا بخراب “الأوطان”…

جينالك وبيك كبّرنا… عجّل يا “راجل” وانصرنا…

لايثور الشعب يدمرنا… ونمشو في فوهة بركان…

صبايحية … صبايحية… صبايحية .. متاع ماريكان”…

(قفصة 2021/08/14).

ظهرت المقالة صبايحية الماريكان… أولاً على أنباء تونس.