“غزوة كارفور
فمة حاجة موش مريقلة في أمخاخنا.
تبدا النيّة باهية بدون شك ولكن الفعل على الحيط.

الجماعة الي مشاو لكارفور تونس توة جادد عليهم هذا دعم لغزة؟ معناها كيف تقطعوا رزق الاف العائلات التونسية، موش الاسرائيلية، بما فيهم الي يخدموا غادي والي يزودوا وغيرهم…وتجوعوهم تكونوا هكة دعمتوا فلسطين؟
نفس الكلام على الي حسب ما يقال تصدوا ليهم …

هكة؟

وكيف تخلقوا تناحر داخلي وكوارث في بلادكم هكة تكونوا قلقتوا إسرا ئيل؟
أكيد غادي يضحكوا …هوما هذاك آش يحبّوا.

كيف هاك المسيرة الي كان هدفها دعم غزة ياخي مشات عملت عركة مع نصف ليبيا ومع مصر…وبعض الي فيها قالوا هذاك المطلوب!

لمصلحة اشكون هذا؟ الفلسطينيين طبعا لا. لمصلحة أعداؤهم؟ أكيد. ضد مصلحة شعوبنا؟ أكيد زادة.
مرة أخرى انا ما عنديش شك في نية الاغلبية الي حرقها القهر قدام الجريمة المروعة غير المسبوقة الي نشوفوا فيها قدامنا، ولكن انو يدفعنا هذا للتدمير الذاتي وحرقان رواحنا…هذا موش مليح…
الاكيد ان الخطاب الرسمي الي قايم على إشعال العواطف من غير قدرة على الفعل والتحريض المجاني، عنده مسؤولية في هذا…

سبعين عام من الهزائم مسؤولة عليها العواطف الفالتة والعقول العاطلة”.

ظهرت المقالة مرزوق و “غزوة كارفور”: تبدأ النية باهية.. و لكن الفعل عل الحيط أولاً على أنباء تونس.

“غزوة كارفور…
شركة كارفور تخدم في برشة توانسة فيهم الي مرسم و فيهم حتى أزواج يخدموا مع بعضهم و ماخذين قروض على شهرياتهم و عندهم صغار تقرى…
كارفور في تونس ماهيش مجرد حانوة او دبو متع سلعة في المرسى راهي شركة منتشرة في كامل الجمهورية… يعني تصوروا قداش من عايلة تاكل منها في الخبز..في بلاد فيها نسبة بطالة مرتفعة و اقتصاد متدهور ينطبق عليه مقال هز ساق تغرق لخرى و تراجع كبير للاستثمار الأجنبي..
هذا الكل و جيك مجموعة من شباب الله اعلم جايين وحدهم و الا مبعوثين

اش قالك و اش قال عليك جايين يناصروا في القضية و يحبوا يحتجوا على شركة كارفور خاطر حالة فرع في إسرائيل و تدعم في جنودها…
باهي يقول القايل ماووا من حقهم يعبروا عن رايهم و يحتجوا سلميا..؟!!

ايه معاك.. أما خارج المؤسسة مش يدخلوا لداخل و يحبوا يفرضوا على الناس بش تقاطع و تغادر المكان!!
الي عندوا موقف يلزموا هو برك ما يفرضوش عالعباد… ما همش اوصياء عالشعب التونسي.. و ما فوضكم حد بش اطالبوا بسمنا بغلق مؤسسة كارفور في تونس..
من حقك تحتج لكن موش من حقك تفرض رايك عالعباد..

و مللخر كي غايضتك غزة و الي صاير فيها برى احتج قدام سفارات الدول الداعمة لإسرائيل و طالب بطرد سفرائها…

يخي كارفور ميش فرنسية..!! ايه بري احتج قدام سفارة فرنسا.. و الا هاذيكا توقفوا قدامها بالساعات فقط بش تاخذوا فيزا اكاهو.. و الا التعليمات خاصة بكارفور فقط..
زيد قبل ما نختم ياخي شادين كارفور على اساس شركة كوكة كولا و اديداس و ايفون و نتفليكس المالكيين متاعها من سلالة الصحابة و الصالحين و يدعموا ليل و نهار في فلسطين…
يزوا مالشعبوية و الفوضى..و البحث المفرط عالبوز و البطولات الوهمية و احتج في الشارع ما تدخلش للمؤسسة..

العنف الي صار يتحملوا مسؤوليتوا المحتجيين موش اعوان الحراسة الي من حقهم بش يحميووا مواطن الشغل متاعهم و حماية خبزتهم و خبزة اولادهم ..

من حقك تحتج لكن موش من حقك تفرض رايك عالعباد…

لا للفوضى…

كل التضامن مع العاملين في شركة كارفور..’.

ظهرت المقالة الأستاذ بوشيبة حول “غزوة كارفور-المرسى”: من حقك تحتج أما…” أولاً على أنباء تونس.