بعد سويعات من الندوة الصحفية المشتركة التي عقدها الرئيسان، التونسي قيس سعيد و نظيره المصري عبد الفتاح السيسي اليوم السبت 10 أفريل 2021 بقصر الاتحادية بالقاهرة، عقب الخبير في الاتصال و تحليل الخطاب السياسي مهدي غزاي بما يلي، و كالعادة بالدارجة التونسية:

“الخطاب هذا أهم خطاب للرئيس قيس سعيد منذ خطاب 17 ديسمبر 2019 ، على خاطر زاد فهمنا شويا ماذا قيس سعيد يريد.

1- على مستوى الشكل : الخطاب و الإستقبال لكل هو #رمز مهم متع قوة و وحدة بين الزوز بلدان، و الرموز مهمة في الجمهوريات : منذ المطار و بدات العناوين الكبرى تخرج حتى في الصحافة العالمية.
يا فريق رئاسي، انشالله فهمتو علاه لازم نعملو خطاب في 14 جانفي (أو 17 ديسمبر) و 20 مارس. الرموز مهمة و هي إلي تقوي في #القيادة.

2- على مستوى تقنيات الخطاب ، الرئيس قيس سعيد كان في نفس طريقة الإلقاء إلي نعرفوه بيها و الخطاب متاعو كان على إيقاع التوازي بين أهداف و مواقف مصر و تونس، و إلي هما ديما يصبو في نفس الهدف و نفس الموقف. و كان قد إختار #معجم_لغوي مهيب و جمهوريي يعطي نوع من حالة الطوارئ إلي تتطلب إجراءات عاجلة.

3- نجيو توا للأهم : الخطاب هذا جاء في زمن الكورونا و وضع إقتصادي للبلدين صعيب برشا.

و لكن لا سمعنا الرئيس بش يجيب تلاقيح ، لا شركات إقتصادية و تسهيلات لشركات صناعية لا شي.

الأولويات باللنسبة للرئيس قيس سعيد و الرئيس عبد الفتاح السيسي هي مغايرة تماماً : التصدي للجماعات الإرهابية ، و تجويف تمويلاتها و محاربة الفكر المتطرف.

تتذكرو الإستعمال المفرط #لضمير “هم” و ديما فما “هوما” عند الرئيس قيس سعيد ، “هوما” ديما الخايبين إلي يسرقوا فينا و يخدموا في مصالحهم ضد الشعب ؟

هاو ليوم تم الإفصاح عليهم : الجماعات الإرهابية إلي تضرب في مؤساسات الدولة التونسية و المصرية ، و تسعى إلى تقسيم ليبيا. هذه هي الأولية.
الكلام هذا ما قالوش في تونس ، قالو في مصر مع رئيس كان يعتبر انو #مرسي و الجماعات الإرهابية إلي تضرب في مؤساسات الدول نفس الحاجة.

4- هذه الأولية ، هي صدى إلى خطاب #عبير_موسي البارح في RDV9 كي سألوها مع شكون مستعدة تتحالف : مع أي واحد ما تحالفش مع لحركة النهضة.
إذن هوني ، حركة النهضة ، من جهة قيس سعيد ، و من جهة عبير موسي : سيشتد الخناق و يمكن يكون خطاب قيس سعيد هذا هو نقطة #لتحول في استراتيجية حركة النهضة.

حاصيلو كل جهة سياسية تسعى إلى تحقيق نقاط و كل جهة عندها الأوليات متاعها ، إلي هي بعيدة كل البعد على أوليات…..#الشعب .

سلطة_الحوار”.

ظهرت المقالة الخبير مهدي غزاي يحلل خطاب رئيس الجمهورية قيس سعيد في الندوة الصحفية المنعقدة في مصر أولاً على أنباء تونس.