“عسلامة شباب،
بالله الموجود في مهدية، كان فما شكون ينجم يتبرع ب Frigo للاستعجالي متاع سبيطار طاهر صفر المهدية؟ حتى على وجه الاعارة، لين تتعدى الأزمة هاذي على خير!
“راهو العدد متاع العباد اللي تجي على ضربات الشمس والإجهاد الحراري في ارتفاع متواصل، ووسائل التبريد محدودة.

“وكان فما شكون يحب يجيب مروحة ولا يتبرع ويجيب كمية متاع ثلج من البرط “القشور” يكون ممتاز !”.

ظهرت المقالة الد. ذوكار يدعو إلى التبرع ب Frigo (حتى إعارة)، لاستعجالي مستشفى المهدية أولاً على أنباء تونس.

“من المفروض حتى وانت بطّال، انشالله حتى وانت ماعندكش أوراق من أساسه، يكون عندك تغطية اجتماعية.

ومن المفروض زادة، انه كي تجي للسبيطار، الدولة تقوم بيك واتداويك وماتخليك ناقص شيء.

باهي هذا المفروض، توة خلي نحكيلكم عالواقع !

في سبيطار مهدية، فما مواطن اسمه وجدي بوزيان، في الحقيقة هو مش مواطن برشا، خاترو مازال طفل صغير وعمرو 16 عام، عمل حادث مرور وتوة راقد في انعاش قسم الاستعجالي متاع السبيطار طاهر صفر المهدية، من جراء اصابة في الرأس والعمود الفقري.
الطفل وجدي يستحق عملية استعجالية للعمود الفقري، والأطباء موجودين وعلى ذمته يستناوا فيه في قسم جراحة الأعصاب، اما المشكلة شنوة؟

المشكلة انه فما معدات للعملية متاعه تتكلف قرابة 8 آلاف دينار، وأحنا ماعندنا مانقولوا للوالد اللي هو عامل يومي (عامل بناء، تعرض لحادث شغل منذ 7 أشهر وهو مايخدمش).
وفي نفس الوقت احنا طالبين منه يوفر 8 ملاين الليلة كان يحب ولدو غدوة يعمل العملية، بش ممكن حظوظه في النجاة تتحسن.

الحاصل، انا مش من عادتي ندعو المواطنين اللي تعرفني، وعندها ثقة حتى شوية، انها تعاون ولا تتبرع.
ونفضل ديما انه نعارك على حقنا كشعب تونسي في الصحة الشعبية اللي تضمن حق كل المواطنين دون استثناء في العلاج، خير من اللي نقعدوا نعاركوا كل مرة على حالة وحدها.

اما المرة هاذي، الشباب في السبيطار المرة، ياسر وجعهم بوه وبداوا يلموا في الفلوس اما الله غالب ظروفنا احنا بيدنا على قدها، وانا شخصيا عمري ماشديت 8 ملاين في يدي ضربة وحدي.

لذا اي انسان ينجم يعاون، يتصل بيا وانا تو نحكي معاه في الخاص لاكثر تفاصيل ونعطيه الملف الطبي وكل معطيات والد طفل وجدي بش يعاون باللي يقدر.
وفي الأخير، تو نهبطلكم التفاصيل الكل متاع تبرعاتكم بالتفصيل لأكثر شفافية، ويكثر خيركم بالمسبق”.

ظهرت المقالة نداء عاجل يتوجه به الد. وجيه ذكار بخصوص حالة اجتماعية أكيدة بمستشفى المهدية.. أولاً على أنباء تونس.