في ما يلي قراءة المهندس حمدي حشاد المختص في علم الطقس والدراسات المناخية الأكاديمية لما حدث عشية اليوم الجمعة في طريق تونس البحرية وTGM:

“الي صار اليوم في طريق تونس البحرية و TGM موش حادث معزول قبلوا باسبوع شاهدنا نفس الموضوع في منزل تميم و دار علوش و الحكاية مهياش مجرد “موجة قوية” عابرة، بل نتيجة تلاقي عوامل جوية وبحرية مع بعضهم في نفس التوقيت و زيد الي البحر اليوم بان واضح وهو يطلع على الشارع، والمياه تزاحم السيارات، والناس تتساءل علاش يصير هذا حتى من غير أمطار كبيرة مباشرة في المكان.

السبب الأول هو الضغط الجوي المنخفض وقتلي يهبط الضغط، ينقص وزن الهواء اللي كان ضاغط على سطح البحر، فيطلع الماء لفوق. القاعدة العلمية بسيطة كل هبوط بـ 1 هيكتوباسكال في الضغط الجوي يقابلو تقريبًا 1 سم ارتفاع في مستوى البحر ومع المنخفضات الجوية العميقة كيما الي قاعدين نشهدوا فيها توى ، الفرق ينجم يوصل لعشرات السنتيمترات من غير ما نحسّوا.
العامل الثاني هو لرياح القوية القادمة من البحر نحو اليابسةالرياح ما تخلّيش البحر في بلاصتو، بل تدفع المياه باتجاه الساحل، ومع السواحل المنخفضة كيما طريق تونس البحرية، الماء يلقى روحو بسهولة فوق الطريق.
العامل الثالث هو الأمواج الموج العالي ما يوقفش عند حدّ البحر، بل يزيد في دفع المياه، خاصة وقتلي تكون الأمواج متزامنة مع ارتفاع مستوى البحر بسبب الضغط والرياح وزيد على هذا الكل، فما عامل عمراني ما ينجمش يتجاهل و الي هو طريق تونس البحرية مبنية في منطقة حساسة جدًا، قريبة من مستوى سطح البحر، وأي ارتفاع بسيط يتحوّل بسرعة لمشكل، خاصة وقتلي تتزامن الظواهر الطبيعية مع شبكة تصريف ما تنجمش تستوعب المياه في وقت قصير.
الي صار اليوم هو مثال حي كيفاش البحر ما يفيضش وحدو، بل يفيض وقتلي الظروف تتجمع ضغط منخفض، رياح قوية، أمواج، وساحل هش. ومع تغيّر المناخ، النوع هذا من المشاهد مرشّح باش يتعاود أكثر، مش كاستثناء، بل كواقع جديد لازمنا نتهيّأوا له , البحر اليوم عطانا رسالة واضحة موش إنذار مفاجئ، بل تذكير إن الشريط الساحلي متاعنا يحتاج تخطيط، حماية، ورؤية بعيدة المدى، خاطر البحر ما عادش يقف عند الخط اللي رسمناه على الخرائط.

*حمدي حشاد

ظهرت المقالة قراءة حمدي حشاد لارتفاع في مستوى البحر على طريق تونس البحرية (فيديو) أولاً على أنباء تونس.