وكتب الفنان صحراوي
“عشت
موش حكاية تتقال ولا رواية تتعاود هذا صوت من قلب الحدث من عين شافت وما نساتش نحكي على وجوه كانت واقفة وما طاطاتش على ناس صمدت رغم القمع وما باعتش كنت حاضر نهار الدنيا تڨلبت و فجأة الوجوه اللي نعرفها ولّت تتخبّى من الرجّة أما صوت الحق أعلى من الخوف كلام خرج من الڨلب ورفض يسكت خاطر الكلام كي يتولد حرّ ما يتكتفش حتى كان يحاولو يدفنوه يرجع ويطلع أقوى من قبل شفت في عينيهم نار ووجيعة أما زادة شفت كرامة ما تنكسرش ناس ما طلبتش شي كبير كان تحب تعيش بحرية وبشرف في وقت ولى الشخص يتعاقب على الحق والباطل عادي وسمعت واحد فيهم يقلي ما تخافش راهو الحق يبان الكلمة هذي ما فارقتنيش عاشت فيا
وشفت نساء تفكّر في صغارها تسأل في روحها شنوّة باش يصير فيهم بعد ما تتشد بين دمعة وخوف قلبها مقسوم بين الزنزانة ودارها وشفت راجل ومرتو الزوز في الحبس وأولادهم وحدهم في دنيا ما ترحمش لا حضن لا أمان كان سؤال يتعاود كل ليلة: علاش؟ وشفت رجال مخلّية وراها عايلتها مطيشة صغار يستناو في باب ما يتفتحش وديار ولات ساكتة من غير صوتهم والوجيعة أكبر من الحكاية أكبر من خبر يتقال هذي حياة تتبدّل في لحظة هذي قلوب تتكسر وتبقى واقفة
أما رغم هذا الكل شفت الصمود شفت ناس ما ركعتش ضحكة مخنوقة بين حيطان باردة أما الروح حرّة حتى كان القيود حاضرة وشفت أم تبكي وتقول ولدي ما ظلم حد غير قال كلمة ووقف مع الحق للآخر ذنبو الوحيد أنو آمن بالقضيّة آمن أنو فلسطين موش بعيدة موش خبر يتعدّى هي وجيعة في الڨلب هي دمعة ما تنشفش من تونس لغزّة نفس الألم ونفس الصمود خاطر القضية موش اختيار ساهل هي موقف يا تكون فيه يا تضيع
ما بين خوف يسكتك وكلمة تدفع ثمنها اخترنا نكونو صوت حتى لو كان الثمن غالي بطول الصمود
ماهمش مجرد أسامي هذوما حكاية عز تتعاش وما تتكتبش وأنا شاهد ونحكي على اللي شفتو بعيني والتاريخ ديما يكتب اللي بقى صامد واللي خان والحق عمره ما يضيع حتى كان يتأخر وصوتنا ما يموتش حتى كان يحبسوه خاطر اللي في الڨلب أكبر من أي قيد وفلسطين تبقى فينا موش مجرد كلمة تبقى قضية تعيش بينا ونعيشو بيها واللي وقف مع الحق عمره ما يخسر حتى كان خسر الدنيا الكل يكفيه شرف المحاولة وصوتو اللي ما سكتش “

ظهرت المقالة صحراوي فنان الراب الملتزم يغني “عشت” لمناضلي الصمود المعتقلين (ومضة من اليوتوب) أولاً على أنباء تونس.