“اليوم بابا مثل أمام قاضي التحقيق في قضية رفعتها ضدّو وزيرة العدل على معنى المرسوم 54.
من 25 فيفري الي فات، اليوم أوّل مرّة نعنّق بابا و نبوسو و نسلّم عليه (مرتين).
المرّة الأولى و هو داخل لمكتب قاضي التحقيق و المرّة الثانية، وقت خروجه.
و في المرتين، كان بالmenottes.
البوليسيّة المرافقين ليه رفضوا حتى بش يخلّيوه يسلّم على اولادو من غير menottes خاطر غازي الشواشي “ارهابي خطير” ما يدخل و ما يخرج للقاضي كان لابس الmenottes.
رغم الي الحكاية ما تجاوزتش ال5 ثواني، اما تشوف بوك منّك ليه و تمسّو و تعنقو عندها طعم خير من 100 ساعة و انتي تحكي معاه عبر الparloir..
اليوم غازي الشواشي جاء مرفوع الرّاس و خرج من مكتب القاضي مرفوع الرّاس و مؤمن بالقضيّة الي يدافع عليها.
و من المفارقات الي تحقيق اليوم كان فرصة بش أولاده عنقوه و باسوه و فرصة لأصدقائه و رفاقه بش شافوه و سلموا عليه من بعيد مادام إدارة السجن حارمة العايلة من حقها في الزيارة المباشرة.
و أقوى حاجة صارت، عند خروج غازي الشواشي من مكتب التحقيق و الابقاء عليه بحالة سراح، المحامين الي كانوا بالعشرات، صفقوا و صاحوا و هو هز يديه الفوق و عمل شارة النصر و هو لابس الmenottes ✌🏻✌🏻
شكرا لكل المحامين الي حضروا مع بابا اليوم و شكرا لكل واحد شارك في الوقفة قدام المحكمة مساندة لغازي الشواشي و ضد مرسوم العار.”.

ظهرت المقالة يوسف الشواشي يتحدث عن احساسه وهو يقبل والده غازي لدى مثوله للتحقيق في قضية رفعتها وزيرة العدل أولاً على أنباء تونس.

فيديو

ظهرت المقالة من مؤتمر التيار: لحظات من حياة غازي الشواشي بالسجن منذ أكثر من 60 يوما كما يرويها ابنه يوسف (فيديو) أولاً على أنباء تونس.