علّق الاكاديمي عادل اللطيفي اليوم الاثنين 21 أوت 2017 عن مبادرة الباجي قائد السبسي الداعية الى المساواة في الميراث والسماح للتونسية بالزواج من غير المسلم.
وقال اللطيفي:
“الناس اللي تقول مسألة المساواة في الميراث حكاية فارغة وما هيش أولوية وماهوش وقتها وهي قضية حدثوت ومناورة سياسية من السبسي فرضها الظرف نحب نقلكم:
– المساواة في الميراث راهي مسألة اجتماعية بالأساس وماهيش مسألة فكرية فقط. وتحسين الوضع الاجتماعي لعديد النساء متوقف عليها.
– حسب تجربتي في جيهتي فريانة وحسب خبرتي المتواضعة أول من باش يستفيد من هذا الإجراء هو المرأة الريفية في حالة وجود ملكية حتى صغيرة. لأنها حياتها كاملة تخدم الأرض والحيوانات وبعدها تجي على برة.
– الموضوع هذا، كيفما برشا مواضيع أخرى، يتوقف عليه اعتبار دستورنا وبلادنا مدنية وإلا خلوط على شريعة على ضبابية مدنية. إذا هاذا ماهوش مهم نورونا على الأهم. على فكرة راهي كل الحقوق والحريات والعدالة الاجتماعية تتوقف على وجود دولة مدنية هي الضامنة للمواطنة. مع التذكير أنا في مرحلة اعادة بناء تنظيمي ومؤسساتي وثقافي.
– نفترضوا اللي مناورة سياسية اشنوة المشكل كيف نحصلوا منها مكسب تاريخي؟ أما أهم مكسب تاريخي لتونس ويدفع الشعوب الأخرى نحو العقلانية والا مجرد انتخابات بلدية ولا حد عاطيها قيمة؟
– راهو خروج المرأة للعمل والمكاسب اللي حقتها من جراء ذلك كان بدفع من الدولة ومن ارباب العمل بعد الحربين لتعويض نقص الرجال. راهو الغاء الرق في تونس كان مناورة من الباي لضمان جنود للجيش النظامي اللي تأسس في 1831.
في التاريخ العبرة بالنتائج وربح المستقبل، أما ظروف المعارك فمهمة فقط للمعرفة التاريخية.
ر.م
شارك رأيك