الرئيسية » الخبير في التحليل السياسي مهدي غزاي: K2 في الحوار التونسي، الاسم كريم الغربي، ناطق (غير) رسمي لليلى

الخبير في التحليل السياسي مهدي غزاي: K2 في الحوار التونسي، الاسم كريم الغربي، ناطق (غير) رسمي لليلى

على اثر ظهور K2 في برنامج “فكرة سامي الفهري” في سهرية السبت 27 مارس الجاري على قناة الحوار التونسي مع الهادي زعيم، نشر مهدي غزاي، الخبير في الاتصال و التحليل السياسي، الاحد 28 مارس 2021 على حسابه الخاص بالفايسبوك، ما استنتجه بعد متابعته الحلقة المثيرة للجدل (باللغة الدارجة):

“هو المسلسل مازال طويل ، و مازلنا بش نشوفو خطابات اخريين. و لكن ايجا نرجعو على حصة البارح خاطر نجمو نتعلمو برشا حاجات.

برنامج البارح ، تم إعدادو ، في مقاربة #معاكسة تماماً من برنامج #ديما_لباس ، و هوني تكمن خبرة Hedi Zaiem في المجال :

1- ال-EXORDE ، معناها #الدخلة: في ديما لباس كانت فما mise en scène كاملة لإستقبال سي K2rhym €: البساط الأحمر ، و الخشوع و اللبسة و حتى تصويرتو مع #العلم.

البارح ، كانت دخلة أكثر من #عادية ، و أخبرنا سي كريم إلي حتى قهوة ما خذاهاش.

و هذي هي الدخلة : K2RYM في بلاتو #محايد ، موش بش يكون فما رمي ورود و هذا إلي يضفي نوع من #المصداقية أكثر في البرنامج هذا.

2- في ديما لاباس ،كانت زادا عنا 13 دقيقة بين مدح “انجازات” سي كريم K2RYM من قبل مقدم البرنامج و ال VTR إلي حضروهولو بموسيقى مرافقة حربية.

في البرنامج هذا اكتفينا بصورة و جملة : مدرسة و سبيطار في حفوز.

الخبر يكفي ، و الطريقة كانت أكثر #متناسبة مع الشخصية إلي يحب يقدمها سي كريم.

3- في ديما لباس ، بدينا بالبساط الأحمر و التهليل : يا كريم سير سير ، مروراً بال “واو” متع نوفل ، و العادل المنفذ و الصك البنكي إلى أخيراً عودة إلى التهليل في تعاليق #الفاسبوك يا كريم يا رئيس.

المشكلة هوني أنو الحصة لكل تكون على نفس الخط إلى درجة تكون #مملة. كيما في فيلم ما يصير فيه حتى شي و البطل ديما فرحان. ما فماش مصعد عاطفي

البارح ، كانت فما #نقطة_أ ، إلي هي سي كريم ما خذاش قهوة و فقرة كرسي الشوك ، إلي عطاو فرصة للضيف بش يجاوب على الإتهامات لكل ، و وصلنا إلى #نقطة_ب ، إلي هي كرسي الحب ، إلي سي كريم يحل فيها قلبو و يقرب للمشاهد في نوع من الإنسانية و المصداقية ، وصولاً إلى نهاية سعيدة :

المقدم و الضيف بش يمشييو ياخذو قهوة مبعضهم.

سيناريو كامل ، يخليك تاخو #إجابات على الأسئلة متاعك ، تطوي الصفحة ، تكتشف الضيف و تقربلو أكثر و يمكن حتى يكسب #مودتك.

4- نلاحظو حتى تغير في ال-Storytelling متع سي كريم : بعد ما كان يخدم في المرما في أوروبا و هو عمرو 16 سنة ، أصبح توا دبر شوية فلوس من الراب و إستثمر في ال-Bitcoin. #سرد ينجم يكون أكثر مقنع لضبابية نشاط ال-BITCOIN و يمكن يتصدق أكثر.

و إلي عندو ملف غير ذلك ، يتفضل ، و كان هو في موقع سلطة/حكم و عندو واجب التحفض، تنجم تعمل تسريبات في الشروق ولا غيرهم.

سي كريم ربي يزيدو و ربي معاه في إلي يعمل فيه ، مع التحفظ على الشكل ، فما جمعيات و مؤسسات تخدم معاهم و موش نهدو هكاكا ، كيما إلي هدو على المطار. نفس الشيء.

لكن ، يبقى نفس المشكل: خطاب k2rhym لم يكتفي بالخطاب من أجل #العمل_الخيري ، و انما هو خطاب #سياسي بالاساس يعتمد على تقنيات خطاب لتمرير #رسالة_سياسية:

من جهة سي كريم ، #مسكين مضطهد من الأحزاب و الحكومة على خاطر يبني في البلاد ، و من جهة أخرى نخبة من سياسيين و رجال أعمال لكلهم فاسدين و يخدمو ضد الشعب، و هذا هو معنى #الشعبوية السياسية.

يا حسرة على وقت بن علي ، إلي قالك ما كانش كل شي وردي و لكن رجل وطني إلخ إلخ إلخ….

(تنجم تتفضل تسمع الشهادات إلي صارو في هيئة الحقيقة و الكرامة على مدى….الوطنية متاعو ) .

و نختمو بقولة :

الإسم : كريم الغربي

المهنة: ناطق (غير) رسمي لليلى بن علي.

#سلطة_الحوار”.

شارك رأيك

Your email address will not be published.