في كبسولة اليوم الموافق للأربعاء 5 ماي 2021 التي نشرها على صفحته الفيسبوكية، يتوقف الخبير في الاتصال مهدي غزاي لقراءة موضوع الاتفاقيات المقترحة من تونس المشيشي الى صندوق النقد الدولي و التي هي في طور المناقشة حاليا ببلاد العم سام، و يبدو ان الاشياء ليست هي، وفق المختصين في الاقتصاد و المالية.
و في ما يلي تحليله، مبسطا و على عادته بالدارجة التونسية:
“جاوني برشا تعاليق و رسائل من أصدقاء يقلك هذاكا هو ما عناش خيرات أخرى لازم نحيو الدعم و نوجهوه إلى الفئات الهشة فقط , و هذا إلي طلبو صندوق النقد الدولي. و في نجاح المشيشي ، نجاح تونس.
هيا مالا حاول تقعد بش تركز مليح و نفسرلك:
1- كي نحيو الدعم على المواد الأساسية ، هذة يساوي قدرة شرائية ضعيفة و ضعيفة جداً للطبقة المتوسطة و حتى فوق المتوسطة .
2- قالك بش تولي الدولة تعطي مباشرةً الدعم إلى الفئات الهشة : هذا تحدي تقني كبير. هل الدولة التونسية عندها الإمكانيات التقنية و اللوجستية بش تحدد شكون لازم يتمتع من الدعم و شكون لا ، و كفاه بش تعطيه الدعم. تي هيا الدولة حارت في منظومة ايفاكس و التجاوزات لكل صارت. المنح متع الدعم بش تولي فيها ترافيك كبيير.
3- الطبقة المتوسطة ، من جهة بش تنحيلها الدعم ، و من جهة اخرى عندها إقتصاد مسكر من قبل عائلات و كارتلات قتلت كل منافسة بقوانين و رخص تعجيزية بش تحمي سي فلان و سي فلان. إذن عدم المنافسة : بش تقعد الأسعار غالية على كيف سي فلان.
4- معناها قدرة شرائية ضعيفة من جهة + غلاء الأسعار من جهة اخرى = ألإتجاه إلى أزمة أعمق ملي أحنا فيها توا.
5- تحب تنحي الدعم ؟ أوكي أما زادا حرر الإقتصاد من الإقفال متاعو و كراسات الشروط و الرخص و المافيات الإقتصادية. و لكن يا ذنوبي ، خاطر:
أ-يا انتوما وقتلي تتفرجو في الفوندو ، الجماعة هذوما يسهرو و يخطو سياسات الدولة مبعضهم.
ب – يا هذوما الوفد إلي يتفاوض ما يحبوش يخدموا و ما يهمهم في الأمر كان ترضية صندوق النقد الدولي و يعملوا carnet d’adresses باهي.
علاش الكلام هذا ما تسمعوش في التلافز و الراديوات ؟ (بأستثناء البعض) على خاطر يستقاطو من هل المافيات الإقتصادية و يخافو يغشو سي فلان يقطع عليهم الإشهار.
ما عنديش دكتورا في الإقتصاد…و لكن عندي شوية منطق و عقل، و الحمدوله الإستقلالية التامة بش ما نجري ورا حد و نصطف كان مع المنطق.
ادعوكم إلى المشاورات مع عباد تفهم أكثر في الموضوع هذا في منظمة ALERT و غيرها. و ما تنساوش تتفرجوا في الفوندو في الموسم الجاي.
#سلطة_المافيات
#باعو_البلاد
#أزمة_قيادة”
شارك رأيك