قبل سويعات من احياء الذكرى التاسعة لاغتيال الشهيد شكري بلعيد، كتب شاعر قفصة مساء أمس السبت 5 فيفري عن “قباض الارواح” و عن “القضاء الذي اغتال القضية” و عن “العصابة العكرمية” … في ما يلي من وحي ذكرى الشهيد :
“في بالك باش تمنع بيها..
واليوم عليها نكافوك..
ونردّو ليك “الشرعية”..
ب”الشارع” و”الفايسبوك”..
و”القضاء” اغتال “القضيّة”..
تسعة سنين وما شدّوك..
..لا ذكروك..لا جبدوك..
و”العصابة العكرمية”..
واقفين لتوّة.. يحموك..؟؟!!
تسعة سنين عشية/صباح..
تتشخلع ..”قبّاض ارواح”..؟!!
و”القاضي” غدّى المفتاح..
وَلا مرة قال انّادوك..
نستدعوك ..ونسقصوك..
حتى.. “مجرد شُكوك”..؟؟!!
تسعة سنين تمشي مرتاح..
وما يهمك في قدرك طاح..
متوقّي ب “جلد التمساح”..
وقدامك “الباراشوك”..!!!
تسعة سنين واحنا نستنّو..
في “القضاة” واش باش يدنّوا..؟؟
طلعوا مع “البشير”يغنوا..
” كانك عريان..نغطّوك..”..؟؟!!
تسعة سنين ماعاد أمل..
كان الهمة والعمل..
وشعب بلادي اليومة مَل..
من “طفّي الضوء على خوك”..
ويا نهار اللي يهب الكل..
لا يخلّي شمس ولاظل..
تلوّج ما تلقاش الحل..
تنادي “قضاتك”… ما يجوك ؟؟!!
في بالك باش تمنع بيها..
واليوم عليها نكافوك..؟؟!!”.
(قفصة2022/02/05)
شارك رأيك