بمناسبة عيد الاضحى المبارك قدمت المصالح البيطرية بوزارة الفلاحة اليوم الخميس 7 جويلية 2022، جملة من النصائح للمواطنين ارفقتها بفيديو توضيحي لتيسيرعملية الذبح وتجنب كل الاشكاليات.
وفيما يلي جملة النصائح التي قدمتها المصالح البيطرية بوزارة الفلاحة ورابط الفيديو :
• قبل الذبح بـ 24 ساعة ما تعلفوش العلوش وتحطو ديما بحذاه ماء نظيف.
• يلزم بلاصة الذبيحة تكون نظيفة وواسعة و بعيدة عن أشعة الشمس.
• نحضرو معدات الذبح وأواني نظيفة لاحتواء جميع مكونات الذبيحة.
• نستعينو في الذبيحة بشخص يتقن هالعملية و يحترم شروط حفظ الصحة.
• يكون السلخ مباشرة بعد افراغ الحيوان من الدم ويلزمنا نحرصو باش الوجه الخارجي للجلد ما يمسش اللحم.
• نردو بالنا باش ما نثقبوش الأحشاء باش ما تتلوثش اللحوم.
• ما نخلطوش الأعضاء و الأحشاء في نفس الاواني و نخبيوالكبدة والقلب والرية مباشرة في الفريجيدار
• أما الدوارة تتفرغ وتنظاف وتتحط مباشرة في الفريجيدار وفي 4 درجات
• ما نغسلوش السقيطة بالماء و نخليوها معلقة في بلاصة مهوية و مضللة ما أكثرش من ساعتين.
• كان باش نستهلكو اللحم في الثلاث الأيام الأولى نخزنو اللحم في الفريجيدار في4 درجات،أما بالنسبة للحم اللي باش نستهلكوه من بعد نجمدوه في18 درجة تحت الصفر.
• نظفو الجلد و نملحوهو يتحط في بلاصة مضللة.
شارك رأيك