على هامش الاحتفال بعيد المرأة، الشاعر لزهر الضاوي يكتب: “همس الصبي”

في ختام زيارته اليوم السبت 13 أوت 2022 لحي هلال بمناسبة عيد المرأة التونسية، الرئيس قيس سعيد يعود للقصر صحبة أفراد عائلة تعيش في غرفة على وجه الفضل و لا عائل لها سوى الأم و لا شغل قار لها. الصور التي نشرتها الرئاسة علق عليها الشاعر لزهر أاضاوي بما يلي، شعرا:

-* همس الصبي”*-

نحب نبقى هوني في القصر
ومانرّوّحش ل”حي هلال”
حي “الميزيريا” و الفقر
حي “البطّال” و “الزّبّال”
“خبيني عندك خبيني”..
ياسيدي الرئيس خلّيني
نشوف العز ونملا عيني
“بابا” مات وضاق الحال

..نحب نذوق أيام في العز
لكن انا مني ملاين
وقصرك قداش باش يهز
والمستقبل ماهو باين
و”الحَرْقة”عليها نتلَز
وانت قداش باش تعاين
وبلادي مابِتْ تفز
وقاسينا من البحر أهوال
وصرنا كيف “أولاد الحجلة”
في كل بلاصة همّال..
وما حبّت :تدور العجلة”..
وحالتنا صارت أحوال..؟!!

..ياسيدي الرئيس اعذرني
ورجعني ل”حي هلال “..؟؟
مانحب بعطفك تغمرني..
وأندادي في نفس الحال..؟!!
نحب نبقى في “حي هلال”..
غير صلّحلي “حي هلال”..؟؟
وتونسنا الكلة صلّحها..
راي الكلة “حي هلال”..؟!!
وكان ناوي صحيح تنجّحها..
يااللا توكل بالأفعال..
يزي رانا شبعنا اقوال..؟؟؟

شارك رأيك

Your email address will not be published.