علقت سنية الدهماني المحامية والكرونيكاز في برنامج “الراف ماغ” على إذاعة الديوان اف ام ، اليوم الاربعاء،على الاحتجاجات السلمية التي انتظمت امس الثلاثاء بمعتمدية جرجيس، إحتجاجا على التعاطي الحكومي مع فاجعة غرق مركب حرقة بالجهة، وقالت “الاشكال ان الدولة برموزها، من رئيس الجمهورية إلى رئيسة الحكومة إلى والي الجهة هوما الي عايشين في عالم موازي ..وخاصة رئيس الجمهوية”.
وشددت على ان المطلب الوحيد لأهالي جرجيس منذ اليوم الاول لفقدان فلذات اكبادهم كان تسلم جثامينهم، موضحة بالقول “بعثو اولادهم او هوما مشاو وحدهم ..هوما يعرفو إلي خمسين بالمايه باش يوصلو او يغرقو..اما مطلبهم الوحيد كان من المرة لولى الحصول على جثث أبنائهم..الكلنا نعرفوا إلي ما تنجم النار تبدى تبرد كان ما تحط العبد العزيز عليك في بقعتو وتمشي للقبر تقرى عليه الفاتحة”.
واضافت سنية الدهماني”انا الي باهتة فيه انو اهالي جرجيس او غيرهم مازال عندهم امل في رئيس الجمهورية..سبق وان قلت أن الشعب قريب من رئيس الجمهورية لكن الرئيس ماهوش قريب من الشعب ..اصلا هو لا يملك الشجاعة لمواجهة شعبه”.
وعلقت على دعوة أهالي جرجيس لرئيس الجمهورية لزيارة الجهة وقالت “قولولو نحبوك حتى لغدوة..هو حب من جانب واحد..ما تنجمش تجبر حد يحبك بالسيف..اليوم رئيس الجمهورية مستقيل لديه هدف وحيد هو مشروعه والانتخابات ..تقومش الدنيا وتقعد..في طمبك احداث جرجيس خرج يحكيلنا على زوز سيارات إدارية تعمل في الانتخابات شفتو إهتمامتو وين؟”.
وأشارت الدهماني إلى “ان رئيس الجمهورية لديه إهتمام واحد هو الوصول إلى 17 ديسمبر..”، مردفة بالقول “رئيس الجمهورية في كوكبه العاجي..و نعلم ما سيحدث سيمسح يديه في الحكومة وفي رئيسة الحكومة التي لا تتحدث ولا توضح ولا تتعاطف ولا تخرج لتصرح..و نعلمها رسميا الي في آخر المطاف باش تتمسح فيها هي”.
شارك رأيك