على اثر قرار الطرد النهائي في حق التلميذة نور عمار من معهد العمران بعد نشرها فيديو في تيك توك كلاما غير لائق في حق أستاذ المسرح مهذب الرميلي قبل أن تعتذر لاحقا، أمين السلايمي أحد تلاميذ معهد الفنون بالعمران ينشر مقطع فيديو على حسابه الخاص مؤكدا أن الأستاذ مهذب الرميلي هو من بين الأسباب التي كانت وراء مغادرته نهائيا المعهد.
و قال موجها كلامه لمهذب الرميلي :”من المؤكد قاعد تشوف في اللايف .. ليلة كاملة نبكي و نتحمل كل مسؤولياتي فلي نحكي فيه لاني باش نجبد أعراض ولا نسب و لا باش نجبد اي شي انا غادرت معهد العمران لبرشا أسباب وللأسف أستاذ مهذب رميلي انت من بين الأسباب وراني لتوا مقهور”، مضيفا أن :”آخر حصة قريتها عندك نتفكر الكلام اللي قلتهولي وأثر فيا برشا …راهو الحضور في التلفزيون و الافلام يعطي صورة جميلة مش كيما الواقع نهار الاول وريتنا الوجه الملائكي .. ليلة كاملة نبكي خاطر الناس الكل تعرف هي كانت حلمة باش وصلتلها و كنت الوحيد اللي بعيد على دارنا مانشوفهمش بالشهرين ومضحي.. انا كنت ديما في الصفوف الاولى والناس تشهدلي و لا عندي في خصومات سياسية وادارية، سوء تصرف من الاستاذ تخاطب فينا بكلام سيئ.. انا نهار الي مشيت نقرى في المعهد امي باعت ذهبها باش شراتلي دبش وفاليجة نقرا كيف اندادي خاطر بابا و ماما مطلقين .. تعرضت للاهانة و التقزيم…”، تعليق التلميذ كان له تأثير على رواد صفحات التواصل الاجتماعي الذين أطلقوا حملات ضد الأستاذ لتصبح القضية قضية رأي عام.
الجمعية التونسية لمدرسي التربية المسرحية، أصدرت من ناحيتها بيان استنكار و مساندة.
و من جهتها، دونت نوال نصرة مديرة المعهد في ما يلي تعليقا على صفحتها الخاصة حول ما صرح به التلميذ السلايمي:
“و الله شديت روحي برشا باش ما نعلقش لكن أنا تو على صفحتي و باش نتكلم و نوجه رسالة من أم لولدها اللي بكات و عنقت و باست ولدها اللي كان مغادر المعهد اللي شدت صحيح و حلفت عليه باش ما يمشيش كنت و مازلت نرى فيه مشروع انسان ناجح لكن يا أمين يا ولدي حرام و عيب و انا تو نكلم فيك بلغة الأم حرام انك تركب على الأحداث و تجبدها عاري و لابس حتى و ان شكرتني نقلك يا ولدي موش أنت اللي لحلحت بيك باش تقعد و سألتك ألف مرة على الأسباب قتلي ظروف مدام و ماعادش نجم الغربة ووو … و عمرك ما جبدت الأستاذ بالعكس عملت معاه تصاور تذكارية بشهادة زملائك و لتو برشا منهم مندهشين من موقفك هذا والله لحد الآن مازلت مانيش مستوعبة اللي عملتو و قاعد تعمل فيه تحب ترجع بعد السب هذاكا الكل موش مشكل أنت ولدنا و نحبوك الكل و أكثر من هكا أنت تعرف اللي أنا نحترمك برشا و فما آليات قانونية نجمو نعملوها باش ترجع أما انك تتجنى على الأستاذ و تستعمل تصاور قدم للمعهد باش تعمل البوز هذا عيب كبير أنت بالذات قعدت معاك برشااااا مرات و تناقشنا و احكينا على النقائص و منهم مرة قعدت معاك أنت و زميلتك نتناقشو التسعة متاع الليل و اتفقنا في الأخير أنو الحل لكل المشاكل متاعنا و في كل المؤسسات أنو لازمنا نبداو بتغيير العقليات و أنو التغيير يكون جماعي و لازم نحطو اليد في اليد الناس الكل باش نغيروا و أنت يا ولدي اللي فيقتني على حاجات قاعدة تصير و بفضلك غيرتها أنت اللي نقعد معاك و أصحابك نحكيو بالسوايع في الجمعة العشية في الساحة و اللي منهم نهار كيف ريتني تاعبة برشا و ظاهر عليا التعب بش ما نقولش الاحساس بالانهزام ساعات قتلي حاسك مدام باش يجي نهار تجي تودعنا و تسلم فينا و تبسمت وقتها أنا و قتلك كانك حاضر أما لاباس لاباس و ديما كنت نقول راني نتنفس بيكم و نتحدى في الصعوبات بيكم لكن الحقيقة مصدومة مصدومة مصدومة انك تنخرط في هالهجمة المجانية و الممنهجة و اللي الله أعلم شكون وراها ضد أستاذك اللي ذنبو أنو معروف و معهدك زادا و بعد تقول نحب نرجعلو و الله ما فهمت شي و آسفة جدا عاللى قاعد يصير و أكثر من هذا مريضة أصلاً على كمية الجحود و المغالطات اللى قاعدة تروج و الباهي الكلو تنسى و التضحيات الكلها تنسات خسارة…… و أمي.ن يا ولدي عندك حق باش يجي النهار اللي باش نخلي الجمل بما حمل ليرتع فيها من كانوا سببا في كل هذه الفوضى ربي يهديك و راجع نفسك و كن نزيها معها و لو لمرة واحدة هذا ليس أنت”.
شارك رأيك