الإعلان اليوم رسميا عن نجاح التونسيين زهرة سليم و كريم بقير اللذان اسسا سنة 2014 شركة اسمها Instadeep متخصصة في الذكاء الاصطناعي الموجه للشركات، مقرها الرئيسي لندن و لها مكتب في تونس.
بش ما نطولش عليكم لأنو قصص النجاح هاذي تستحق ايام حديث..!، وفق خليل قنطارة الذي غلق على هذا النجاح الصادر عن شركة Biotech، مضيفا ما يلي:
“زوز توانسة : زهرة سليم و كريم بقير، أسسو شركة إسمها Instadeep في 2014 متخصصة في الذكاء الإصطناعي الموجه إستعمالو للشركات..!
الشركة عندها مكتب في تونس ثم أصبح مقرها الرئيسي في لندن و عندها مكاتب في دول أخرى..!
تطور الشركة كان سريع و صاروخي..
و عمناول برك تحصلو على levée de fonds بقيمة 100 مليون دولار من برشة شركات و على رأسهم Biontech.
اليوم شركة Biontech ولات totalement séduite بشركة Instadeep و خدماتها و كفائتها ياخي قدمتلها عرض شراء تام و كلي إلي تم الموافقة عليه و هو قيمتو 450 مليون أورو مع إمتيازات أخرى منها أسهم في شركة Biontech بيدها لكل من كريم بقير و زهرة سليم إلي أصبحو des actionnaires في الشركة العملاقة الألمانية.
إيه نعم 450 مليون اورو..!
ما يقارب 1500 مليار بفلوسنا..
يعني ربع قيمة المبلغ إلي تونس كدولة كاملة تحب تقترضو من عند FMI و هو ما يقارب 6000 مليار بفلوسنا.
إييه نعم هذا الكل بفضل تحالف العقل التونسي مع التكنولوجيا..
و كان يتم تشجيع كل العقول و تقديم التسهيلات توى الموارد البشرية و الطاقة الشبابية و الذكاء يردو البلاد هاذي كيف دبي و خير..!
لكن كيف تبدى مازلت تحكي على شركات أهلية متاع ألف رقبة في رأس المال و مشاريع شبت و كسبر و تحط في المليارات غادي ما دام بش نمشيو و نوخرو كيف بول الجمل..
القدرات موجودة.. الحلول موجودة.. لكن إلي ينجمو يوفرو الأرضية إلي تستغل هذا الكل و توصلو للنجاح مزالو في عصور الجاهلية..”، وفق خليل قنطارة.
شارك رأيك