تعدى شهر على مباشرة أعضاء مجلس نواب الشعب لمهامهم النيابية من غير التصريح بمكاسبهم ومصالحهم في خرق جليّ للفصل 31 من قانون تضارب المصالح لسنة 2018 اللّي يعتبر التصريح، كيف أداء اليمين بالضبط، شرط للمباشرة واللي من غيرو النوّاب ما يكتسبوش صفتهم النيابية وما ينجموش يمارسو مهامهم.
وكيما تعرفوا نهار 13 مارس 2023 انعقدت أوّل جلسة للبرلمان وتمّ انتخاب رئيس مجلس النواب ونائبيه وفي نفس النهار تمّت المصادقة على أعضاء لجنة النظام الداخلي إلي من بينهم السيدة النّائبة سيرين مرابط.
إلى حدّ الآن كلّ شيء يظهر عادي لكن اللي ممكن برشا ما يعرفوهش هو إللّي السيدة سيرين مرابط بخلاف إنّها نائبة في البرلمان هي instagrameuse وعندها حوالي 96 ألف متابع على حسابها على انستغرام.
الغريب في الأمر إنّه السيدة النّائبة ما منعهتهاش صفتها النيابيّة من قبول هديّة، من شركة LBM لصاحبها أمير بن عيسى، ابن رجل الأعمال جلال بن عيسى، إلى يواجه منذ الثورة شبهات فساد مالي و إقتصادي عديدة بسبب تورطه مع نظام بن علي وتعددت في حقه الاتهامات آخرها مثوله نهار 11 نوفمبر 2021 قدام قاضي التحقيق في القطب القضائي الإقتصادي والمالي في قضية تتعلق بالحصول على قروض من بنك عمومي دون احترام التراتيب وبعدها تمت إحالته بحالة سراح من قبل دائرة الاتهام في نفس القطب في أفريل 2022 هذا إلى جانب قضايا اخرى
على معنى الفصل 96 من المجلّة الجزائية.
وبما أنّه السيدة نائبة الشعب instagrameuse ، عملت نهار الأحد 9 أفريل 2023إلي يصادف عيد الشهداء Unboxing وشكرت La marque على الهديّة إلى بعثوهالها والمتمثلة في صندوق معبّي بالبشكوطو والكايك (لن نقوم بنشره لأنه فيديو فيه أبناءها القصّر).
نذكرو إلي القانون عدد 46 لسنة 2018 ينص في فصله 27 على أنه :” يجب على الأشخاص الخاضعين لأحكام هذا القانون الامتناع عن قبول هدايا لأنفسهم أو لمن تربطهم بهم صلة، تؤثر أو من شأنها أن تؤثر على أدائهم الموضوعي والنزيه والمحايد لواجباتهم المهنية.” و انّه حتى الهدايا الرمزيّة لازمها تقبل بعد استشارة الهيئة الوطنية لمكافحة الفساد وبما أنّه ما فماش أمر حكومي يضبط قيمة الهدايا إلي يمكن قبولها فإنّه المنع يسري على الشكلاطة والبشكوطو وأنّه في الحالات الكل يتعين على السيّدة سيرين مرابط إعلام الهيكل العمومي الراجعة إليه بالنظر إلي هو البرلمان بكل هدية تتلقاها وبالجهة المانحة. “ويتولى الهيكل العمومي تسجيل الهدية بدفتر خاص يمسك للغرض.” وهذايا حسب الفصل 28 من قانون تضارب المصالح والإثراء غير المشروع.
اللي فاتكم أغرب، البارح الجلسة العامة لمجلس نواب الشعب صادقت على الفصل الرابع من مشروع النظام الداخلي وإلي هي عضوة في اللجنة إلي صاغتو و إلي ينص في الفقرة الأولى منو على كونه ” يتعيّن على كل عضو التصريح بالمكاسب طبقا للفصل 20 من الدستور.”
هذا اللي نجّمنا نعرفوه مالستوريات وما خفي كان أعظم بالنسبة لباقي النواب و في ظلّ مواصلة خرق السيدات و السادة النواب لواجب التصريح بالمكاسب والمصالح، ما نعرفوش :
⭕️ علاقة النائبة سيرين المرابط بشركة LBM والمصالح اللي تجمعها بالشركة هذه وبعايلة بن عيسى
⭕️ قيمة المكاسب المباشرة وغير المباشرة والأرباح الرّاجع للنائبة سيرين مرابط من ال unboxing
⭕️ هل هذا يدخل في باب الاشهار اللي يقومو به صنّاع المحتوى ويتلقّاو عليه مقابل مادي وإلّا هديّة رمزيّة (بشكوطو وكايك) لنائبة الشّعب وأبنائها كيف ما قالت هي في الفيديو؟ مع العلم اللي الفصل 5 من النظام الداخلي اللي صادقت عليه اللجنة يمنع على النائب ممارسة أي نشاط آخر بمقابل أو دون مقابل
وبما أنّه من المتوقّع غرايب تضارب المصالح والإثراء غير مشروع تزيد، نطالبو رئيسة الحكومة نجلاء بودن بإصدار الأمر الحكومي المتعلّق بضبط النظام القانوني للهدايا مع العلم وأنّه مشروع الأمر الحكومي معروض على الاستشارة منذ 5 ماي 2020 ولم يتم إصداره بعد.
Ommi el ghalia
شارك رأيك