“سمّي واعزل كيما تحب..
لا سلطة من بعد “الرب” ..
انت “الأمر انت الناهي”..
واحنا معاك “السعد تكب”..؟!!
سمي واعزل “نص الليل”..
بلا تبرير بلا تعليل..
واحنا نغنولك مَواويل..
نقولو “هكة ربي حَب”..؟!!
سمي واعزل لين تلقاه..
“راجل “.. ولد أمو وباباه”..!!
والحاكم ديمة أحنا معاه..
ماللي كانت “الشُعَبْ”..!!
..واحنا والله “غير حشومة” ..
قبلنا بيها في الحكومة..
“بكّوشة” ياسر.. و”مشومة”
كانت للخراب سبب..؟!
..نحبو “راجل” م”البنوك”..
يقوم يعوعش كالسردوك..
يدعس عالناس الْ قِلبوك ..
يجيب المال ” صْبَبْ صْبَبْ”..!!
..وكان حب “يحِِشنا حَشّان”..
وكان حب يفِِشنا فَشّان..
و”عَجلتنا” لبعيد يرميها ..
بين اليونان.. ولبنان..؟!!
..واذا ما قدرش يداويها..
نشوفو غيرو أولى بيها..
ولّا نقولو… “بول عليها”..
ونبقو نعيشو على ” الخُطَب”..!!
سمي واعزل كيما تحب..
لا سلطة من بعد “الرب”..!!”.
…………..تذكير
- تفاجأ التونسيون مساء أمس في ساعة متأخرة من الليل بالبلاغ التالي الذي نشرته على صفحتها الرسمية رئاسة الجمهورية في حدود الساعة منتصف الليل:
” قرر رئيس الجمهورية قيس سعيد، مساء اليوم الثلاثاء 1 أوت 2023، إنهاء مهام السيدة نجلاء بودن رمضان رئيسة للحكومة وتعيين السيد أحمد الحشاني خلفا لها”.
شارك رأيك