في التدوينة التالية التي نشرها عشية اليوم الخميس 24 اوت 2023 على حسابه الخاص بصفحات التواصل الاجتماعي بالفايسبوك تحت عنوان “تونس و المحاسبة” ، تطرق وزير الشغل الأسبق فوزي بن عبد الرحمان الى مسألة ترثها منظومة عن أخرى سبقتها و معتبرة “اللي التاريخ بدا معاها…”:
“تونس و المحاسبة
لاحظتوش حاجة؟ كل منظومة جديدة تبدى بزوز حاجات : تفسخ اللي قبلها الكل.. و تعتبر اللي التاريخ بدا معاها..
و تعدي الوقت الاول في محاسبة اللي سبقوا..
و هذا تاريخ تونس عندو عقود. و هو في الحقيقة عقل متاع العرب المسلمين..
قداش ضيعت البلاد وقت في محاسبات عمرها ما وصلت للآخر؟ قداش ضيعنا فلوس في عدالة انتقالية شيء ما عملت؟ قداش ضيعت النهضة وقت للبلاد في حكاية الدولة العميقة؟ و قداش ضيعنا وقت و مجهود في محاسبة المسوولين في نظام بن علي؟
و قداش قاعدة منظومة قيس سعيد تضيع في وقت لمحاسبة جزء من اللي حكمو.. و ما تعرفش علاش و الا كيفاش تتحبد القضايا ؟
كل منظومة تجيب معاها ناس يطالبو بالمحاسبة..
و لكن ما ثماش برشا ناس قالو.. يا اولادي عندم عشرات السنين و انتوما تطالبو بالمحاسبة.. زعما علاش عمرها ما صارت ها المحاسبة اللي تحكيو عليها في كل الانظمة؟
على خاطر الجواب يقلق.. و احنا مجتمع ما نحبوش نشوفو حقيقتنا كيما هي.. نحبو نقولو على ارواحنا شعب ذكي و متثقف و نشعرو بالثمالة وقت يجي واحد براني يدغدغلنا أحاسيسنا.
احنا ما ناش قادرين على المحاسبة الحقيقية.. اللي تراو فيه و اللي ريتوه في السابق موش محاسبة اما تصفية حسابات.. على خاطر المحاسبة الحقيقية توري اعوار الشعب الكل موش كان اللي يتحاسبو.. كل واحد كيف يتحاسب و مانيش نقول هنا ما يلزمش يتحاسب ثما مئة واحد وراه يلزم يتحاسبو في جرتو..
و لكن المحاسبة الصحيحة هي اللي تمشي للاسباب العميقة متاع الفساد و تصلح القوانين و تصلح الموسسات و تعري القيم الاجتماعية اللي تخلي الفساد مستشري بالطريقة هاذي..
الي تراو فيه موش محاسبة علي خاطر المحاسبة ما تاقعش بالشماتة و الحقد و الكراهية.. هذيكا تتسمى تصفية حسابات.
المحاسبة تتعمل بهدف واحد انو ما تتعاودش العمايل هذيكا..
تصفية الحسابات ما عندها كان هدف الحكم و البقاء في الحكم و هذاكا علاش كل منظومة تجي تبدا بتصفية حساباتها مع اللي سبقو.
مانيش نقول المحاسبة زايدا.. و لكن نقول اللي تعملو فيه اليوم و اللي عملتوه في السابق موش محاسبة. هو تضييع وقت كان ينجم يكون ثمين باش نطويو صفحة الماضي بنظافة و نخزرو القدام و نبنيو البلاد بلاش حقد و خاصة بلاش فساد:.
شارك رأيك