في التدوينة التالية التي نشرتها اليوم الأربعاء 27 سبتمبر 2023 على صفحتها الفايسبوك المحامية و الناشطة الحقوقية دليلة بن مبارك مصدق تعبر عن وجع الاحتفال بالعيد النبوي الشريف في غياب الأحباء و خاصة جوهر بن مبارك أخيها الأستاذ الجامعي والمناضل السياسي المسجون منذ أشهر عديدة بتهمة التآمر على أمن الدولة و الذي دخل في إضراب جوع منذ يومين.
الاعياد عندنا موش مسالة ماكلة واطباق وتصنيف…
الأعياد هى ريحة الصغر والزمان الجميل…
الاعياد هى ذكرى العايلة…الأم الحاركة… والمامة الصنافة..: والصغار اللي يملاو صحن الدار…
الأعياد تبدلت والأجواء حولها ولات باردة وروايح مساطت…
ورغم عن ذلك باقي نحاولوا نلوجوا على هاكي الريحة البنينة حتى بالكذب… لمجرد الحفاظ على الصورة الجميلة متاع الصغر في ذاكرتنا…
اليوم ولأول مرة المولد باش يكون بالنسبة ليا مرتبط بصورة خايبة
لا يزى غابت العصيدة لا أم حاركة ولا مامة صنافة الله يرحمهم… ارتاحوا من هم ها الزمان الأغبر…
و انا ما عادش فيا قوة …
ولا يزى جوهر مرمي في الحبس لا ماكلة لا شراب تو نهارين في إضراب جوع… الكاس تعبى وفاض… وما عادش بيها وين…
اختار انو يحارب باللي ينجم… وما تبقى كان بدنو يقاوم بيه
وفي هذا الكل نتفرج في أصحاب البارح اللي كانوا عايشين في دارنا سنوات واكلين شاربين مادين كرعيهم وتبارك الله أعدادهم بالمئات مشتلة داخلة ومشتلة خارجة…
الناس هاذم موش متقلقين والا متحيرين يدقوا في العصيدة ويحكيوا في الكورة ويهبطوا في النكت…
بالنسبة ليهم جوهر ينجم يموت ينجم يمرض ينجم يبيع بدنو قطايع ينجم يتظلم ينجم يتسجن موش مشكل المهم قيس سعيد نحى النهضة…
حجم الخراب اللي في أمخاخهم يفجع … وبيناتنا كيف نراهم على ما يقززوني نخير نخسر جوهر بالموت وهو يقاوم ولا نرضى نراه ذليل كيفهم حتى ساعة…
جوهر سيدكم يا أقزام….
شارك رأيك