في تدوينة نشرها في ساعة متأخرة من مساء الجمعة 23 فيفري على حسابه الخاص بالفايسبوك، قال هيثم المكي الصحفي بإذاعة موزاييك أنه سيمثل يوم 16 ماي القادم أمام القضاء بصفاقس على معنى الفصل 24 من المرسوم 54 عل خلفية القصية التي رفعها ضده مستشفى الحبيب بورقيبة بصفاقس. و في ما يلي نص التدوينة؛
“قولوا لي مبروك : التحقت أخيرا بقائمة الصحافيين المطلوبين للعدالة على أساس المرسوم 54. و ماهمش شوية.
نهار 16 ماي، سأمثل أمام القضاء في صفاقس، على أساس الفصل 24 من المرسوم 54، على خلفية القضية اللي رفعها ضدي مستشفى الحبيب بورڨيبة بصفاقس.
الشكاية حاجة من أقوى المسخرات اللي ريتها في السنوات الأخيرة. السبيطار شاكي بيا بتهمة نشر خبر تجاوز المشرحة لطاقة استيعابها في أفريل 2023، و وجود جثث لمهاجرين غير نظاميين في الكولوارات، مع صور للجثث، على موقع فيسبوك. و مضمن مع الشكاية كاپتير… من موقع إكس (تويتر سابقا).
الحساب اللي يظهر في الكابتير ماهوش متاعي، لأنه على عكس حسابي، لا يحمل علامة زرقاء. و الكابتير لم تتم معاينتها من طرف عدل منفذ كما يقتضيه القانون، للتأكد من صحتها. و نعاود : الشكاية تقول أني نشرت على فيسبوك، و الكابتير من تويتر.
لكن الأهم من هذا كله، أن الخبر المذكور غير زائف بل أنه تنشر في عشرات وسائل الإعلام المحلية و الدولية، و تنقل من العاملين في المستشفى نفسه، اللي وقتها كانوا يطلقوا في “صيحات الفزع” بسبب تجاوز طاقة استيعاب المشرحة، إضافة إلى مسؤولين في الدولة قالوا نفس الكلام. يعني ماهوش زائف، و العالم الكل نشره. علاش السبيطار شاكي بيا أنا ؟ ما ندروش.
الأقوى من هذا، أن نص الشكاية بيدها لا يقول أن الخبر زائف، بل يقول أني نشرت الخبر “بدون إذن، و لتأجيج الأوضاع”. هاذي نعديوها، بدون تعليق.
حاصيلو أي مختص في القانون يشوف الملف يقول لي الشكاية هاذي المفروض تتحفظ حال رفعها، و آخرتها تتحفظ بعد الاستماع ليك. لكن هاي تحالت للمحكمة، و عندي جلسة نهار 16 ماي، في صفاقس، بتهمة نشر أخبار زائفة، المرسوم هذاكة. العقوبة : 5 سنين حبس، و كان المستشفى يعتبر “موظف عمومي”، عشرة سنين.
هالبلاد ضبعت، ما عاد فيها حتى كابل مبرنشي في بلاصتو. أنا باش نحرق قبل ما تشكي بيا مدرسة اعدادية في ڨفصة بتهمة نشر نسبة النمو”.
شارك رأيك