تم ايقاف الوزير الأسبق غازي الشواشي، الأستاذ المحامي و الأمين العام لحزب التيار مساء يوم 24 فيفري من سنة 2023 في منزله و بعد سويعات، تم الاستماع اليه لمدة ربع ساعة وفق ما تم تداوله يومها من العديد من زملائه المحامين و ايداعه مباشرة السجن يوم 25 فيفري من نفس الشهر في القضية المعروفة اعلاميا بقضية التآمر 1. بمناسبة قضائه 3 سنوات وراء القضبان، نجله يوسف يكتب ما يلي بكل حرقة:
“اليوم تعمل 3 سنين في السجن. 1096 يوم عدّيتهم بين 4 حيوط في ظروف بعيدة كل البعد عن الإنسانيّة.
3 سنين ظلم و قهرة و تعب و حرمان و اضرابات جوع و أمراض و قفّة..
3 سنين ما كنتش حاضر لا على نجاح بنتك و لا على ولادة أحفادك.
حكموا عليك 18 سنة ابتدائي و بعد زادوا طلعوها ل20 في الاستئناف في بالهم بش يحطموك.. في بالهم بش نسلموا.
اما قد ما عملوا ما نجموش يكسروك و يطيحوك: ديما واقف، قوي و صابر و حتى في اصعب الظروف تضحك.
المحنة هذي، رغم قساوتها، ما ضعفتّكش.. بلعكس زادت قوّاتك و قوّاتنا معاك. اكتشفنا في رواحنا حاجات ما كنّاش نتصوروها موجودة فينا. عرفتّك و عرفتنا ببرشا عباد… اصدقاء و رفاق لقيناهم وقت الي ما لقيناش أقرب الناس لينا. قربتنا بباقي العائلات و باقي المعتقلين و فقنا الي اختلافاتنا ما تعني شي قدام الظلم خاطر الظلم ما يفرّقش اما يجمّع.
انا متأكد الي فرحت برشا البارح بخروج صديقك حمد صواب لعلها تعطيك جرعة أمل بش تزيد تقاوم.
التاريخ قاعد يتكتب يا بابا…
و قريب يجي النهار الي يوفى فيه هالهبال و هالعبث و يقعد مرحلة مظلمة و سطر في تاريخ هالبلاد.
نهار آخر، أحفادك و أولادهم بش يكونوا فخورين بيك و ريوسهم عالية كي يقولوا جدّي هو غازي الشواشي.
خاطر الكرامة و الشرف يتورّثوا..
كيما زادة العار يتورّث، و أسامي سجّانيك بش تبقى مربوطة بالظلم و وصمة عار ما تتنحّاش تلاحقهم و تلاحق صغارهم مهما حاولوا يبيضوها.
الحق ما يموتش
و الظلم ما يدومش”.
شارك رأيك