ورد ما يلي في صفحة حركة حق التي تدعو تحت عنوان “حرية التعبير والإعلام… رفاهية ولغة خشبية؟ وإلا قفتك وعيشتك اليومية؟”
و تضيف حركة حق باللغة العامية التونسية بما أن خطابها موجه لعامة الشعب يا يلي:
“فما شكون يحب يقنعك اللي معركة حرية الإعلام هذي حكاية “برستيج” ومتاع سياسيين ومثقفين في البلاتوات، وإنت كمواطن زوالي لاهي في همك وقفتك وخبزة صغارك، ما عندك فيها حتى ناقة ولا جمل.
أما إيجى نحسبوها بالمنطق ومغير ما نغطيو عين الشمس بالغربال:
لو كان الإعلام يتخنق وصوت التعبير يتسكّر، شكون باش يتجرأ يتكلم على غلاء الأسعار؟ شكون باش يفضح سبيطار ما فيهوش دوايات؟ وإلا نقل عمومي يعذب في العباد؟ شكون باش يحكي على الفساد والتهميش؟
وقت اللي يسكت الإعلام، المسؤول اللي ما يخدمش على روحو يرقد متطمن ومرتاح.. خاطر يعرف اللي ما فما حتى صوت باش يقلو “وين مشات الميزانية؟” وحرية التعبير هي السلاح الوحيد اللي مخلي صوتك يوصل قبل ما تتدفن مشاكلك في القجر.
“حرية التعبير مش رفاهية زايدة.. حرية الإعلام هي “النَّفَسْ” اللي تتنفسو باش تاخذ حقك وباش يحسبولك ألف حساب. هي درع المواطن التونسي قبل ما تكون مطلب للسياسيين.
وباش نرفعو صوتنا مع بعضنا وما نخليوش حقنا يضيع..
جيب معاك صاحبك، قريبتك، وجارِك.. وشارك معانا في المسيرة من أجل حرية التعبير والإعلام
الموعد: 5 جوان
التوقيت: 17: 30
المكان/الانطلاق: ساحة الشهيد البراهمي
صوتك هو اللي يحميك.. حضورك واجب وموش رفاهية! “.
شارك رأيك