نقلا عن الد. وجيه ذكار رئيس جمعية الأطباء الشبان
“وقت تقرى الدراسة اللي قام بها المعهد الوطني للدراسات الاستراتيجية في 2024 حول هجرة الأطباء، و بالرغم اللي يذكر برشا أسباب، منهم الأجور الضعيفة و ساعات العمل اللي برشا، لكن أهم عامل تم ذكره وبنسبة 35%، اللي هو الوضعية الاقتصادية والاجتماعية والوضعية العامة في تونس.
أكثر من ثلث الأطباء قاعدين يخرجوا للسبب هذا !
ونتصور الناس الكل تعرف الوضعية اللي نعيشوا فيها من الماء اللي يقص، الضوء اللي يقص، الفيضانات اللي قاعدة تصير، غلاء المعيشة..الخ هاذم الكل أسباب خلات أنه المنظمة التونسية للأطباء الشبان تنفتح وتتعامل مع بقية المواطنين والمنظمات في تونس باش تعبر على رايها إنه البلاد راهي ما لازمش تواصل بالطريقة هذي، ولازم نحسنوها لينا احنا والأجيال اللي بعدنا.
النضالات اللي تقوم بها الOTJM ما عندها حتى معنى وقت اللي البلاد تكون وضعيتها تعيسة.
خاتر وقت نعملوا اضرابات للترفيع في الأجور، وفي المقابل نلقاوا تضخم وغلاء أسعار، وكيلو طماطم ب5 آلاف، وال banane ب30 دينار، راهو ما عملنا حتى شيء.
وقت اللي وضعية الأطباء حتى كانت تولي مريحة ماديا، لكن الماء يقص والضو يقص، راهو هذا يتسمى “ميزيريا” ، وما هوش وضع يخليك تعيش وتعمل عائلة في تونس.
وقت نطلعوا في قيمة منحة الاستمرار، لكن المستشفيات فالسة ومدير السبيطار يقولك أنا ما عندي حتى مليم، والفلوس الكل عند الCNAM واللي هي زادة فالسة، لذا ما نجموش نخلصوكم، الله غالب.
ولا وقت نعارك انا عال tenues للأطباء الشبان والمسؤول يقولي ايه عندك الحق أما أنا ما عندي حتى مليم بش نشريلكم زي العمل متاعكم.
ووقت نشوفوا أنه الطبيب راهو ما هوش معزول على البيئة متاعه، خاطر احنا ما نجموش نعملوا ال médecine اللي قريناها، وقت اللي فمش équipements et matériels،
وما نجموش نخدموا، كان ال paramédical ناقصين،
وما نجموش نطالبوا بتأمين المستشفيات والعمل في أمان وقت اللي فماش أعوان حراسة..الخ من المشاكل اللي تظهرلنا انه المشكلة أوسع من فقط مشاكل الطبيب الشاب ومشاكله المباشرة والخاصة بيه كان هو.
هذاك علاش لازم الناس الكل تكون موجودة في الاجتماعات العامة، خاطر أصلا منظمة أطباء الشبان ونقابة الأساتذة الجامعيين ما عادش ينجموا يعملوا حتى شي، والاجتماعات مع الوزارة ولات منعدمة، وما عادش فم حتى حوار مجتمعي، و ما عادش يحبوا يسمعوا منا، بل بالعكس أصبح فما هرسلة للمكتب التنفيذي متاع المنظمة وتهديد متواصل بالإيقافات خاطرنا نتكلموا.
في الأخير نطلب من جميع الطلبة ومن الأطباء الداخليين والمقيمين والأساتذة متاعنا والناس اللي يهمها بلادها ويهمها الحال وتحب تصلح، إنها تكون موجودة في الاجتماعات العامة اللي باش تصير في كلية الطب في تونس، المنستير، سوسة وصفاقس.
وعاشت نضالات الأطباء الشبان!”.
شارك رأيك