“أولا الله يرحمو و ينعمو و يصبر عايلتو و أصحابو … وفاة شاب في مقتبل العمر كارثة قاصمة للظهر .

حسب محاولة ربط المعطيات ببعضها ……

الطالب تعكرت حالتو نهار الثلاثاء في الليل، صحابو طلبو من المبيت يوفرولهم سيارة اسعاف لنقلو للمستشفى و لم يتم تمكينهم من ذلك ، السبب حسب مدير الخدمات الجامعية للوسط هو انو المبيت موش مصحح اتفاقية مع سيارات الاسعاف …. علما و انو الحماية المدنية و سيارات الاسعاف الطبي SAMU ما يستحقوش حتى اتفاقية تتصحح معاهم باش ينقلو المرضى ، تكلمهم تفسر الحالة يجيوك بالوقت … انا في قسم الانعاش في سبيطار المنجي سليم في المرسى كانت عنا سيارة اسعاف طبي SMUR عندها تلفون وحدو hotline محطوط في وسط القسم و فمة طبيب 24 ساعة على 24 ساعة يلزمو يكون موجود على بعد لحظات مالتلفون باش يخرج في دقائق هو و الفريق لاسعاف الشخص الي يطلب و هذا نحكيلكم عام 2002 .

باهي حسب تقاطع المعلومات ، المرحوم عدا ليلتو في المبيت و من غدوة هزوه للسبيطار في حالة صحية حرجة جدا و توفى بعد 50 دقيقة ملي وصل للسبيطار . حسب الطبيب الي اسعفو المرحوم كانت عندو meningite الي تجي من بكتيريا و الا من فيروس و في بعض الحالات تكون خطيرة جدا و تتطلب علاج في أقصى سرعة …. الحالة الي وصل فيها المرحوم كان ذيجا فات الفوت و رغم الانعاش و الدوايات توفى الله يرحمو .

في الحالة هذي الفريق الطبي شك في meningite و طبعا شك في البكتيريا الي تعطي النوع هذا متاع les meningites و الي تطلب وجوبا انو الناس الي كانو قريب للمرحوم ياخذو في اقرب وقت مضاد حيوي الي حسب التصويرة المتداولة هو la rifampicine …. و الي يلزمو يتعطى في اقرب وقت و لمدة 48 ساعة و الي انجمو نعطيوه فقط لمجرد الشك موش لازم نستناو نتيجة التحليل .

نهار الجمعة العشية وصلت المعلومة للادارة الجهوية للصحة انو فعلا هي meningite و البكتيريا هي فعلا الي تستوجب تلقي العلاج للناس الي كانو قريب مالمرحوم فتدخلت الادارة الجهوية للصحة و بعثت زوز طبة للمبيت باش يفرقو الدواء .

الاشكال كان في طريقة توزيع الدواء و انعدام التواصل و التفسير … و في ظل نظرية المؤامرة الي سايدة ظن بعض الطلبة انو العملية مؤامرة و دخلو الناس الكل في حيط و تم احتجاز الاطباء في كرهبتهم و منعهم من العمل و صارت حالة من الفوضى و التدافع و اكيد كانو فيها طلبة ملي دخلو في contact قريب من المرحوم و كان هوما حاملين للبكتيريا و عندهم اعراض ينجمو بالتدافع هذاكة يكونو عداو طلبة اخرين .

المضاد الحيوي لونو احمر و يلون البولة و ممكن اللعاب و حاجات اخرى بالحمر و ممكن يعطي ردان …. تزيد تهيج نظرية المؤامرة و الفايسبوك و يوليو الطبة عطاوهم دواء خلاهم يردو في الدم و طبعا هذا غالط و يحبو يقتلوهم للتغطية على الخطأ الاول و هذا طبعا ضرب من الجنون اما عادي في اطار الشعبوية و المؤامراتية الموجودة .

الخلاصة :

** الاخطاء القاتلة :

• تأخير نقل المرحوم للمستشفى لأكثر من 12 ساعة هو علميا سبب رئيسي للوفاة ، الاعمار بيد الله و لكن ممكن ياسر لو تلقى العلاج في العشية او في الليل كان ينجم يمنع
• تأخير في اعطاء الدواء لوقاية الطلبة الي كانو قريب مالمرحوم ما حقوش صار و لكن تم عمل جدي لتلافي هذا و تشكر عليه الادارة الجهوية للصحة
• الشعبوية و نظرية المؤامرة كانو ينجمو يعملو كارثة البارح في المبيت و هذا و نعاودها للمرة المليار راو كارثة كبيرة تضرب في بلادنا و باش تدمرنا

** الاشياء الايجابية :

• التدخل السريع و العلمي الممتاز لطبيب الاستعجالي الي على فكرة هو طبيب مقيم يعني مازال يعمل في الاختصاص متاعو و الي tres probablement باش يهج كيما زملاؤو خاصة بعد الحملة الي تعرضلها…. و ممكن بعد عشرة سنين طالب اخر تصيرلو نفس الحالة و نهزوه فيسع للسبيطار اما ما نلقاوش طبيب
• التصرف العلمي الممتاز للادارة الجهوية للصحة بتمكين الطلبة من الدواء للوقاية

===> حادثة اليمة تفسر بوضوح قداش فمة مشاكل خخطيرة في بلادنا و للامانة منذ سنوات طويلة … زادت الشعبوية و نظرية المؤامرة صبت الزيت على النار …. و السلام …. ردو بالكم على اولادكم …. و على طبتكم””.

ظهرت المقالة الد. العباسي يوضح ما حصل للطالب الذي توفي في مبيت القيروان و يعلق على حالة توتر الطلبة (فيديو) أولاً على أنباء تونس.

كثر الحديث في الأيام الأخيرة بل الجدل حول تأخير التلاقيح في تونس التي أصبحت الشغل الشاغل للمواطن الذي لم يعد يخفي غضبه تجاه حكام برعوا بعد 10 سنوات من ثورة الكرامة في الفشل، بعدم قدرتهم على تسيير شؤون البلاد من توفير حق الشغل و الصحة.

التلاقيح، موضوع الساعة، و كل في كوكبه، وزارة الصحة تفاوضت مع روسيا من جهة، و قيس سعيد يطلب من وزير الشؤون الخارجية بالبحث عن مخرج في أسرع وقت و كان له ذلك بعد أن وعدت الجزائر عبر وزيرها للخارجية نظيرها التونسي عثمان جرندي بأن حال تسلمها التلاقيح فستتقاسمه مع تونس و من هنا انطلقت و بمرارة الألسن، منها من يشكر بلد “الاخاوة” الجار الذي لا ينسى الجميل في وقت الحرب ضد الاستعمار الفرنسي و وقوف تونس بجانبها، و منها من يبكي على تونس التي استباحت التسول، تونس التي شيدت استرتيجيتها فجر الاستقلال على التعليم و الصحة. و تونس التي قامت ثورتها على الكرامة. و في هذا الشأن ، عبر الدكتور ماهر العباسي، الاخصائي في الانعاش و التخدير، من خلال تدوينة نشرها صباح اليوم الخميس 14 جانفي عن رأيه و جاء فيها ما يلي:

“التلقيح الرّوسي فيه جرعتين ويسوى 5 دولارات …. معناها 6 ملاين تلقيح نلقحو بيهم ل50% مالشعب التونسي يسواو 30 مليون دولار ( على فكرة اليخت هذا إلي في التصويرة le kogo شاريه مولاه ب 60 مليون دولار )… يعني بالنسبة لدولة ميزانيتها 12 مليار دولار كيما تونس يعني تقريبا مليار دولار في الشهر…. المبلغ هذا يمثل 1/30من ميزانية شهر … كاينك إنت تخلص مليون وباش تنقذ عايلتك يلزمك تدفع 30 دينار . أي إنسان عندو ذرة كرامة يجبد ال30 دينار من مكتوبو وينقذ حياة عايلتو …. شنوة تعمل الدولة المتسولة متاعنا .

رئيس الجمهورية يكلف وزير الخارجية باش يكلم وزير خارجية الجزائر باش يقلو يا كريم متاع الله شوية تلقيح يا صاحبي …. ياخي الرئيس الجزائري يقرر يقسم التلاقيح مع تونس ( في حركة رائعة وتلخص شنوة معناها تونس والجزائر وبارك الله فيه ) ولكن وضعية مهينة جدا لتونس خاطر وصلنا نطلبو في حاجة تسوى أقل من 30 مليون دولار .

المصيبة الأكبر في الموضوع أنو وزارة الصحة تفاوضت ديجا مع روسيا وباش نشريو التلقيح قبل فيفري …. يعني الرئيس الي من كوكب آخر أهان بلاد كاملة هكاكة في الفارغ فقط باش بمركي بونتو شعبوي سياسوي مقزز

يعني نعيشو في دولة …. إلي يحك راسو ياخو قرار ممكن يدمر بيه صورة بلاد في العالم خاطر يحب يمركي بونتو لواحد يكرهو عادي جدا ….. آه يا تونس

#ثورة_الكرامة”.

ظهرت المقالة في الذكرى العاشرة لثورة الكرامة: الدكتور ماهر العباسي الاخصائي في الانعاش و التخدير يكتب: “الدولة المتسولة” أولاً على أنباء تونس.