أبيات بأبيات، قصيدة مقابل قصيدة و تبادل السب شعرا و يتواصل منذ أيام الشجار بين المناضل، شاعر قفصة الملتزم لزهر الضاوي و النهضاوي سمير ديلو الذي خيل للناس انه اسلامي “لايت” و لكنه تغير مؤخرا و نزع القناع بعد ان سبق ان اعلن استقالته من النهضة بسبب الغنوشي. في ما يلي رد ديلو على الضاوي مساء السبت 8 جانفي الجاري:
عاد سي لزهر ..
مرحبا ..!
مع عودته اكتشفت أنّه اكتشف أنّي بردّي عليه ” ولّيت نِفهِم في المشاعر ” ..!؟
خويا لزهر .. عمّ لزهر .. يااااااااااا سي لزهر ..!
كيفاش عرفت ..!؟ 🤨
أحسبها ممازحة .. وأتقبّلها بصدر رحب ..
وعسى أن تقبل تفاعلي معها .. بنفس رحابة الصّدر :
هكّة ..!؟ ” إخواني بايِد ” ..!؟؟؟
عُدْتْ ..!؟ مالا هاني عايدْ ..!
لزهر ما عندوش زْهَرْ ،
ما يعرفش لحمي مُرّ ،
شاعر طالع م القبَر ..
نسى شِعرو خلاّه ،
وقعد شعيرو بحذاه ..
رقد البارح .. قايم توّ ،
الضّاوي قصّ عليه الضّوّ..
الضّاوي .. ما ضواش ،
يِحسِب روحو ما كيفوش ..
شريف يهاجم في الأوباش ،
لابِد يضرب بالكرتوش ،
وْإِخْرِتْها .. تعلّم الكلاش ..!
لزهر ما عندوش زهَر ،
قعد يتلكّش ع البشر ..
برشة .. وآخِرهم سمير ..
يِترَصّد .. فمّاش خْطَر ،
بالكشي فمّة تكفير ..
وَلاّ يقولوا صام .. فْطَرْ ،
والا كان مُومِنْ .. وكْفَر..!
خويا لزهر .. إيجا نقُلِّك :
مادامك شاعر دمدوم ،
كيف نرُدّو عليك اليُوم ،
نِتْرَشُّو زعمة مِلّي بَلِّكْ ..!؟
بعد الشّهيد والشّهادة ،
ولّت عندك السّعادة ،
توجّهلي .. تُهمة الإخوان ..
وتروّح .. زاهي فرحان ،
كايِنِّك .. صيد بوقلادة ..!؟؟
خويا لزهر يا بطَل ،
قدّم ما تخاف من حدّ ..
إِخْرِتها يِبقالِك حلّ ،
برنامج .. يوم الأحد ..
تِفرِش أوراقِك للوافي ،
وتِبكي على الشّعب الحافي ،
وتِبعثلو .. شُحنة أمل ..!
يظهرلي فيه التّلكيش ،
يزيد فوق ريشك ريش ..
وجيوبك تتعبّى بقشيش ،
الشّهيد ..!؟ مشى وسط الزّحمة ،
يِكفيه .. يزّيه الرّحمة ..
هو مات .. وانتي عيش ..!
أيّا تِبقى عَلَى خير ،
وبلَّغ سلامي لاصحابِك..
واخطاكْ مِنّو سمير ،
تِكتِبْ .. يُوصِلِّك جوابكْ ..!
تونس .. مع السّبعة ودْرَجْ ،
تْواصِل !؟.. نِرفع الحرجْ ..!”
شارك رأيك