ردا على الاتهامات التي طالت السيدة التي صفعت سائق التاكسي والحملة التي شنها ضدها رواد مواقع التواصل الاجتماعي كتبت المراة المذكورة رساله شرحت فيها دوافعها لارتكاب فعلتها.
وقالت المرأة في رسالتها :
رسالة الى اصحابي و الناس الي تعرفني شديد المعرفة ، اما الي ما يعرفونيش قاموا بالواجب اليوم ، اليوم صارتلي غريبة الغرايب حسيت روحي ما نيش في بلادي في بلاد اخرى كثر فاها التبوريب و الي عندو شوية قوة على خوه ما يرحموش ، اليوم انا زعمة مت مرتين مرة اولى لانو سائق سيارة تاكسي و انا في اتجاهي من قنطرة منوبة الى محكمة منوبة كان ورايا في القنطرة و القنطرة راي صغيرة ما تعديش زوز كراهب وراء بعضهم ، كان ورايا ولا قدامي و فيسع من اقصى اليسار شد اقصى اليمين ، قتلوا خويا من l extrême lel extrême قلي ماني حطيطتلك كليناتور ماو حل عينك مشفتوش ، و هو حط كيناتور وقت ولي وقف ، انا قلت ملا عباد و مشيت و هو قلي ” برا كذا كذا يا كذا……. ”
انا وقفت و هو هبط من كرهبتو و دخل يدوا للكرهبة متاعي و ظربني على كتفي و في يدي و نحالي المفتاح من الكرهبة و نحالي تاليفوني من بحذايا و انا نجبد و هو يجبد ، شدني كريز و و ليت نعيط اعطوني تاليفون باش نلكم راجلي و لا واحد حب يعطيني تالبفون و هو قدامي يتهدد علي لين طلت بوليسة من بحذا سبيطار القصاب الى كان ما جاتش هي انا اليوم نروح في صندوق لبنتي ، و حكات معاه قتلوا رحعلها تاليفونها و مفتاحها وقتها زبانية سامي الفهري بداو يصوروا ، لا صوروه كي تقبح في و دخل يدو لكرهبتي و نحالي المفتاح و التاليفون و لا صوروني و انا نتبربص في القاعة و جات الحماية هزتني للـ urgence .
انا سيدة فاضلة غصبا عن الجميع و الي يمسلي شرفي ناكلوا بسنية ، خاطر بابا راجل و راجلي راجل و انا مرا حرة ، و القانون هو الفيصل . و انا كي قلت راني مساعد قضاء منيش نستعرض في عظلاتي ، بل غاظتني روحي كيفاه انسانة بقيمتي و محترمة نفسي و نخدم على روحي ، انسان كيما هكاكة يقولي كلمة توجعني و الاكيد انو الكلمة الي قاللهالي راو يقول فاها كل يوم يا لاختو يا لمرتو يا لاي مراة حتى متعدية في الكياس.
شارك رأيك