فعلا أصبح عالم الانستغرام مستغولا و لا يخضع لأي رقيب. و لا أحد له فكرة عن مستحقات العاملين في الانستغرام الذين لا يخضعون لأي قانون. و ما أدهى و أمر هو الزحف مؤخرا نحو القطاعات الممنوعة وفق القانون من الاشهار. الناشطة السياسية فاتن الحاج ساسي تكتب:
“أي سيدي…أنا قلتلكم باش نواصل نحكي في موضوع الانستغراموزات…و على فكرة برشة ميساجات وصلتني
و كابتير من عند عديد أصحاب المحلات الكبرى
و الصغرى..حاجة أخرى باش نزيد نوضحها …أنا فاتن الحاج ساسي ك نحكي في موضوع راهو ما نحكيش فيه بصفتي المهنية أو نقدم في ميساجات لمنافسين ليا..الناس الكل تعرف اللي أنا ناشطة سياسية و مطلعة على عديد الملفات و برشة يعرفو اللي أنا صوتي يوصل ..دونك ما فماش علاش باش بعض المنافسين يتقلقو من كلامي…و يبداو يحكيو في التراكن…انساوها صفتي المهنية…..موضوع الانستغراموزات موش باش نسكت عليه لانهم زحفو حتى لعالم الطب و المهن اللي ممنوع فبها الاشهار….و بالمناسبة أدعو كل طبيب أو طبيبة أنو يبعثلي أو يعلم conseil d ordre حتى نوقفو هالمهزلة متاع تمييع عالم الطب و نرجعو حقوق برشة أطباء تظلمو من جرة كذب الانستغراموزات….المكياج المضروب اللي داخل بوه على خوه كونترا و الانستغراموزات تصور فيه….الشكلاطة اللي قاعدة تدخل تهريب و يصورو فيها لا حسيب و لا رقيب….شنو تستخايلو بلاد ولات ضيعة محروس!!!!..من تو نقوللكم فمة عباد باش تتجند…و كل قطاع باش يتم الاتصال بيه …لوضع حد لهذه المهازل.. حتى من كلينيكات لحقها الطش…و تعمل في publicité في الانستقرام… شنوة هاذا ؟ وين ماشيين ركبتو على العباد
و شوهتو النجاح الحقيقي …و طمستو براعات برشة عباد ….نعرف عباد ناجحة بالدكتوراة معتصمة تلوج على خدمة…عباد كلاها الشر..بلاد على كف عفريت…
القطاعات الكل تضربت بالميوعة متاع كرونكارات بودورو
و أنستغراموزات رأس مالهم تاليفون تضرب في عشرات الملاين……موضوع للمتابعة حول هذا الجدل و الرفاهة في زمن التفاهة
فاتن الحاج ساسي …ناشطة سياسية”.
………………………
تحيين:
“تلقيت عدد كبير من الرسائل حول جدل موضوع الانستغرام من طرف حقوقيين و نساء أعمال و سياسيين و إعلاميين فاعلين و أصوات حق و سيتم التعامل مع الأمر بجدية…حيث ستتظافر الجهود في الايام القليلة القادمة و سيتم تقديم عريضة ممضاة من مختلف الأطراف إلى السيد رئيس الجمهورية ووزارة العدل …و وزارة الصحة ووزارة المالية…ووزارة التجارة…..و ستتم متابعة الموضوع بجدية لانه صراحة أصبح الانستغرام يشكل خطرا مثله مثل التجارة الموازية…و يجب هيكلته و إدماجه في السلك القانوني…لانهاء الجدل و لضمان الشفافية و خاصة كي لا يصبح حزام أمان للاقتصاد الموازي..
للموضوع بقية و متابعة…..تونس أمانة و علينا أن نتجند لحماية ما تبقى من الوطن لانه يغرق و ينزف.
أدعو كل غيور و غيورة للمساندة و ذلك بتوعية الناس .
فاتن الحاج ساسي “.
شارك رأيك